I burgosuri i shoqëruar nga ekipi i CNN-it, pasi u lirua nga rebelët sirianë ishte në fakt një anëtar famëkeq i forcave të presidentit të rrëzuar Bashar al-Assad, i cili mashtroi multimedialin amerikan dhe rebelët për ta ndihmuar atë.
Salama Mohammad Salama – një toger i parë në Inteligjencën e Forcave Ajrore Siriane – dyshohet se ka mashtruar rebelët dhe Clarissa Ward të CNN për ta nxjerrë atë nga burgu javën e kaluar në një video tronditëse, raporton Verify-Sy, një kontrollues lokal i fakteve.
Salama gjithashtu ka një histori të gjatë të krimeve të supozuara të luftës, shtoi gazeta siriane.
Videoja virale e shpëtimit të supozuar ka tërhequr vëmendjen mbi detajet kryesore në lidhje me paraqitjen dhe reagimin e Salama-s ndaj daljes nga burgu.
CNN ka nisur madje një hetim të brendshëm për artikullin.
Një problematikë e ngjashme me ekipin e CNN dhe gazetaren Ward u regjistrua po ashtu gjatë regjistrimit të një “breshërie masive të raketave” pranë kufirit Izrael-Gaza.
Shumë përdorues të mediave sociale ngritën dyshime për një inskenim të mundshëm, duke sjellë edhe reagimin e multimedialit që shpjegoi se nëpër videot e shpërndara ishte ndryshuar audio e regjistrimit origjinal.
I vetëm në një burg të zbrazur
Ekuipazhi i transmetimit u ndesh me Salama-n në atë që dukej të ishte e vetmja qeli e mbyllur në një strukturë sekrete në Damask që tashmë ishte boshatisur.
Ekuipazhit, i cili po kërkonte për gjurmët e gazetarit të zhdukur amerikan Austin Tice, iu kërkua të fiknin kamerën e tyre ndërsa një rebel qëlloi kyçin e derës e qelisë.
Pamjet më pas tregojnë një qeli të zbrazët, që duket të jetë e pastër, përveç një batanije të shtrirë në qoshe.
Një ushtar i armatosur tërheq batanijen, duke zbuluar në mënyrë dramatike një burrë që ulet menjëherë dhe i mban duart lart i frikësuar.
Burri e identifikoi veten vetëm si Adel Ghurbal.
Verify-Sy, megjithatë, zbuloi se nuk kishte të dhëna për një Adel Ghurbal në rajon – duke i çuar verifikuesit e fakteve drejt identitetit të tij të vërtetë.
Asnjë shenjë torture
Ajo që ra në sy për Verify-Sy ishte mungesa e qartë e lëndimeve ndaj Salama-s, pavarësisht pretendimit të tij se ai ishte mbyllur në izolim brenda burgut në selinë e Inteligjencës së Forcave Ajrore Siriane.
“[Ai] dukej i pastër, i rregulluar dhe fizikisht i shëndetshëm, pa lëndime të dukshme apo shenja torture – një portret i papërshtatshëm i dikujt që supozohet se mbahej në izolim në errësirë për 90 ditë”, shkroi Verify-Sy.
Shumë përdorues në mediat sociale gjithashtu shpejtuan të vinin në dukje pamjen e tij të pastër kur krahasoheshin me imazhet e të burgosurve të tjerë të liruar, të cilët ishin të çrregullt, të kequshqyer dhe të shënjuar nga lëndimet në të gjithë trupin e tyre.
Asnjë reagim ndaj rrezeve të diellit
Një tregues tjetër kyç se Salama po gënjente ishte fakti se ai nuk dukej të kishte ndonjë reagim domethënës ndaj dritës së diellit kur u përcoll jashtë burgut nga gazetarja Ward dhe ekipi i saj.
“[Ai] nuk puliti sytë as kur shikonte qiellin” pavarësisht se kishte thënë se nuk i kishte parë rrezet e diellit për tre muaj, vunë në dukje kontrolluesit e fakteve.
Kush është Salama Mohammad Salama
Pas arratisjes së tij nga burgu, Verify-Sy e identifikoi njeriun në videon e CNN si Salama Mohammad Salama, i cili punonte në disa pika kontrolli sigurie në Homs dhe ishte i përfshirë në vjedhje, zhvatje dhe shtrëngim të banorëve që të bëheshin informatorë të Assad-it.
Ai gjithashtu vrau civilë gjatë luftës civile siriane në vitin 2014 – dhe dyshohet se ka arrestuar dhe torturuar të rinj me akuza false, shumë prej të cilëve refuzuan të paguanin ryshfet, raportoi Verify-Sy.
Vendasit pretendojnë se ai u mbyll në burg ku u zbulua për më pak se një muaj për shkak të një mosmarrëveshjeje me një oficer të lartë për ndarjen e parave të zhvatura.