Ndërsa tensionet mes Izraelit dhe Iranit janë në kulmin e tyre, vëmendja po kthehet drejt figurave kyçe që po ndikojnë në vendimet e presidentit të SHBA-së, Donald Trump.
Një prej tyre është Gjenerali Michael Kurilla, kreu i Komandës Qendrore të SHBA-së (CENTCOM), i njohur edhe me nofkën “Gorilla”.
Gjenerali Kurilla po shfaqet si një “skifter” i fuqishëm ndaj Iranit, duke shtyrë Trumpin drejt një operacioni të përbashkët ushtarak kundër Teheranit.
Përforcimi ushtarak amerikan në Lindjen e Mesme shihet si një tregues i rritjes së ndikimit të Kurillas, kërkesat e të cilit, sipas burimeve, janë pranuar thuajse të gjitha, pavarësisht skepticizmit të zëvendësshefit të shtabit, Dan Caine.
“Gorilla”, një zë i rëndësishëm në ekipin e Trump
Kurilla është gjenerali që kohët e fundit ka kaluar më shumë kohë me Trumpin dhe ai tek i cili presidenti mbështetet për shumë nga vendimet e tij. Kreu i Pentagonit i ka dhënë atij fuqi dhe autoritet të konsiderueshëm, duke e bërë atë një nga zërat më të rëndësishëm në ekipin e sigurisë së presidentit.
I njohur si një ekspert i luftës dhe një figurë që nuk preferon ekspozimin mediatik, Kurilla njihet për natyrën e tij shpesh të ashpër. Guximi i tij, megjithatë, nuk vihet në dyshim as nga kritikët.
Në vitin 2005, ai udhëhoqi trupat amerikane gjatë një shkëmbimi zjarri në kulmin e luftës në Irak, pavarësisht se u qëllua tre herë, një akt heroik që i dha atij Yllin e Bronztë.
Kurilla ka udhëhequr Komandën Qendrore të SHBA-së që nga viti 2022 dhe së shpejti pritet të dalë në pension. Nën udhëheqjen e tij, Shtetet e Bashkuara mbështetën Izraelin në përgjigjen e tij ndaj sulmit të 7 tetorit nga Hamasi.
Që atëherë, ai ka vizituar Izraelin në mënyrë të përsëritur për të koordinuar ndihmën amerikane për operacionet në Gaza dhe Liban dhe për të forcuar mbrojtjen e vendit përballë sulmeve hakmarrëse nga Irani vitin e kaluar.
Dritarja e mundësisë dhe dalja në pension
Ndërsa afrohet dalja në pension e Gjeneralit Kurilla, zyrtarët amerikanë dhe izraelitë që favorizojnë një shtytje të SHBA-së drejt Iranit e shohin dritaren për një sulm të SHBA-së si të ngushtuar.
Ata e konsiderojnë një dritë jeshile të mundshme nga Trump për këtë operacion si shansin më të mirë dhe ndoshta të fundit për të vepruar. Kjo situatë shton presionin mbi vendimmarrjen e presidentit Trump për një lëvizje që mund të ketë pasoja të gjera gjeopolitike.
Ansa