Kreu i partisë Shqipëria Bëhet, Adriatik Lapaj, zhvilloi këtë të shtunë një protestë para Kryeministrisë. Mes personave që morën fjalën ishte edhe një individ i prezantuar si “emigrant”, i cili në mënyrë spektakolare hodhi letra në formë dollarësh, si simbolikë ndaj zyrtarëve qeveritarë që ndodhen në burg për korrupsion.
Por kush ishte ai në të vërtetë?
Burime bëjnë me dije për TemA se personi në fjalë është Bledar Meti, ish-oficer emigracioni në Mbretërinë e Bashkuar, i angazhuar më herët në identifikimin dhe deportimin e emigrantëve pa dokumente, përfshirë edhe emigrantë shqiptarë. Por, TemA mësoi gjithashtu se paralelisht me këtë funksionin e tij zyrtar, Meti kishte hapur edhe një biznes privat (lavazh) në emrin e tij, ku punësonte pjesëtarë të fisit të vet, të cilët rezultonin pa dokumente pune dhe me qëndrim të paligjshëm në Britaninë e Madhe.
Pasi Home Office u njoh me faktin se ai ishte pronar i një biznesi ku punësonte persona pa dokumente — ndërkohë që vetë kishte detyrë zyrtare luftën kundër emigracionit të paligjshëm — Meti u shkarkua nga puna. Situata u konsiderua konflikt i hapur interesi dhe shkelje e rëndë e rregullave që ai vetë ishte i ngarkuar t’i zbatonte.
Duket se protesta e Lapajt kundër korrupsionit përfundoi duke u përfaqësuar nga një ish-zyrtar që luftonte emigracionin e paligjshëm në letër, ndërsa e ushtronte atë në praktikë, duke u shndërruar kështu në një reklamë të pavullnetshme të hipokrizisë që pretendonte të denonconte.