Avokati i Saimir Tahirit, Maks Haxhia, ka shpjeguar hapat që do të ndjekë mbrojtja e ish ministrit, për ta liruar atë sa më shpejtë nga burgu.
Avokati tha se do të kërkohet pafajësia e ish ministrit dhe se në Gjykatën e Lartë, do të kërkohet procedurë e përshpejtuar.
“Ne aktualisht presim në mënyrën më urgjente të zbardhet vendimi. Ato që lexova në media janë çmenduri. Do të bëjmë rekurs në Gjykatën e Lartë dhe do të kërkojmë që ta vënë në procedurë të përshpejtuar, sepse zoti Tahiri është në burg.
Çdo gjyqtar që do të marrë çështjen, duke patur parasysh argumentat tona, duhet të vihet në alarm dhe ta vendosë në proces të përshpejtuar. Ne presim që Gjykata e Lartë, ta prishë këtë vendim dhe të japë pafajësi.
Edhe pse u arrit njollosja e Tahirit, sepse futja në burg edhe nje ditë të quan fajtor dhe të heq mundësinë të rikthehesh në jetën politike. Ne presim pafajësi”, tha avokati Haxhia në TPZ.