Aksident në Gjermani! Tre të rinj humbin jetën pas përplasjes së nëntë automjeteve! Mes viktimaven dy kosovar

Aksident në Gjermani! Tre të rinj humbin jetën pas përplasjes së nëntë automjeteve! Mes viktimaven dy kosovar

Një aksident i rëndë automobilistik në rrugën B311, pranë qytetit Erbach në Gjermani, u ka marrë jetën tre personave, mes tyre edhe dy të rinj shqiptarë nga Kosova, Leart Morina nga Sopniqi dhe Berhan Zeka.

Viktima e tretë është një 26-vjeçar, i cili ndërroi jetë në spital disa orë pas aksidentit.

Sipas mediave gjermane, në aksident u përfshinë gjithsej nëntë automjete, ndërsa tre persona të tjerë mbetën të plagosur. Mes tyre ishte edhe një 26-vjeçare, e cila u transportua në spital me plagë shumë të rënda. Gjendja e saj shëndetësore nuk ishte bërë ende e ditur nga autoritetet.

Nga hetimet paraprake dyshohet se drejtuesi 18-vjeçar humbi kontrollin e automjetit gjatë një manovre parakalimi, teksa po lëvizte me shpejtësi të lartë mes zonave Dellmensingen dhe Donaurieden. Makina e tij u përplas me automjete të tjera dhe më pas u përplas ballazi me një automjet që vinte nga drejtimi i kundërt.

Përplasja ishte tepër e rëndë, duke i shndërruar automjetet në një grumbull rrënojash. Në vendngjarje mbërritën forca të shumta policie, zjarrfikësish dhe ekipesh emergjence. Rruga B311 qëndroi e bllokuar për më shumë se 20 orë.

Policia gjermane ka nisur hetimet për të përcaktuar shkaqet dhe rrethanat e plota të aksidentit. Për këtë qëllim është angazhuar edhe një ekspert, ndërsa po merren në pyetje dëshmitarët e ngjarjes.