Konferenca për emigracionin në Vjenë ka prodhuar përplasje mes ministrit të Brendshëm italian, Matteo Salvini me ministrin e Jashtëm të Luksemburgut, Jean Asselborn. Ky i fundit ishte shprehur më herët se Europa po plakej dhe kishte nevojë për emigrantët. Ndërsa Salvini me nota ironie iu drejtua se ndoshta emigrantët afrikanë, të cilët ai i quajti skllevër, i duan në Luksemburg, por Italia ka tjetër politikë. Salvini shtoi gjithashtu se nuk do pranonte kurrsesi të zëvendësonte europianët që nuk bëjnë fëmijë për shkaqe ekonomike me emigrantë afrikanë.
Dëgjova një koleg më parë të shprehej mbi nevojën e emigracionit pasi popullsia europiane po plaket, por unë kam një perspektivë krejt ndryshe. Unë jam në qeverinë italiane e paguhem nga qytetarët e mi për të parë se si të rinjtë tanë nisin të bëjnë fëmijë si një kohë më parë, e jo për të parë se si të rinjtë afrikanë vijnë e zëvendësojnë europianët që për arsye ekonomike nuk kanë më fëmijë. Ndoshta në Luksemburg kanë këtë domosdoshmëri, në Itali ne kemi nevojë të bëjmë fëmijë e jo për skllevër të rinj që zëvendësojnë fëmijët që ne nuk i bëjmë dot më.
Deklarata e Matteo Salvini ka shkaktuar reagim të fortë tek ministri i Luksemburgut Jean Asselborn, i cili duke hequr kufjet e i përplasur me forcë në tavolinë, është shprehur me ton nervoz e në frengjisht duke iu drejtuar Salvinit: “Mbylle! Në Luksemburg i dashur zotëri ne kemi me mijëra italianë që erdhën të punonin me ne si emigrantë, në mënyrë që ju në Itali të kishit të ardhura për fëmijët tuaj.”...tha ai. Më pas ministri Asselbornm mbylli mikrofonin me një koment jo të këndshëm: “”M*t…”