Jari vendosi të japë kontributin e tij kundër paketës “Antishpifje”, përmes një letre drejtuar Parlamentit shqiptar, OSBE, BE dhe OKB, në të cilën shpreh shqetësimin e tij për këtë situate:
“Të nderuar zotërinj!
Siç jeni në dijeni, nesër Edi Rama do të kalojë në Parlament, një paketë ligjore kundër shpifjes në mediat online, e cila synon të paralizojë mekanizmin kryesor të opozitës në luftën e saj politike.
Në qendër të sulmit është Facebook-u i Doktorit, i cili ka mbi një milionë ndjekës.
Përmes këtij sulmi ligjor, Edi Rama kërkon të mbyllë Facebook-un e Doktorit, për shkak se ai ja ka kaluar në numra atij të Ramës, ose konkurron me të.
Këtë gjë Rama nuk e duron dot.
Duke eleminuar median më të madhe digitale të opozitës, që është Facebook-u i Doktorit, qeveria synon të ndalë denoncimet e popullit tek njeriu që beson, dhe t’i quajë ato si shpifje.
Më tej do të jenë të rrezikuar të gjithë, pasi 40 për qind e lajmeve në portale mbështeten tek postimet e Doktorit, 20 për qind tek postimet e Lulit, 10 për qind tek postimet e Tit Vasilit dhe Ilir Metës, dhe 30 për qind tek postimet e Ramës dhe lali Erit.
Pas kësaj, rrezikohet që rreth 70 për qind e postimeve të eleminohen dhe të ngelet vetëm 30 për qindshi i Edi Ramës.
Ky rrezik bëhet akoma më i madh, po të kemi parasysh që gazetarët tanë nuk kanë mundësi të postojnë shkrime kundër oligarkëve në vend, jo se ka ligj, por se pas kësaj nuk ka reklama.
Kështu, mirë që nuk shkruajnë dot kundër oligarkëve me emër, por ata nuk do shkruajnë dot as pa emër kundër tyre, pasi të vetmit gazetarë kurajozë në Shqipëri, janë Sali Berisha, Ilir Meta, Tit Vasili dhe Lul Basha.
Gazetarët e tjerë thjeshtë komentojnë punën e tyre.
Duke bllokuar ata, gazetaria shqiptare vihet në rrezik, dhe gazetarëve në terren do t’u mungojë lënda e parë.
Ndaj të nderuar zotërinj, vini dorën në zemër dhe mos lejoni Edi Rama të ndëshkojë gazetarinë reale në Shqipëri, dhe aktorët më kurajozë të saj.
I juaji, Jari!”