Nga Mero Baze
Ish- prokurori i Përgjithshëm, Adriatik Llalla, është tërhequr nga e drejta e tij për të aplikuar si gjyqtar në Gjykatën e Apelit, funksion që ja garanton ligji për Prokurorinë, ish- prokurorit të Përgjithshëm. Shtypi e ka interpretuar këtë si një frikë të Adriatik Llallës nga Vetingu, dhe mungesa e dëshirës për t’u përballur me këtë proces.
Kjo vlen si perceptim për aktin e tij, por nuk vlen realisht për atë që mund të ndodhë. Në vendimin e tij për ta lënë me kaq këtë punën e drejtësisë, natyrisht që ka ndikuar përvoja e gjatë e historisë së potitikës dhe drejtësisë në Shqipëri, që kur largohesh askush nuk merret me ty. Kështu është sjellë drejtësia me çdo pushtetar që largohet. Askush nuk është marrë më, me çfarë kanë bërë ata.
Nuk u mor askush me ish- qeverinë “Nano”, nuk u mor askush, as me ish- qeverinë “Berisha”, dhe për forcë zakoni, të gjithë janë të bindur se në këtë vend, sado zullume të bësh, po ike shpëton, se nuk merret njeri me ty.
Në këtë pikë, gjesti i Llallës është shumë llogjike të merret si një sukses i Vetingut, si një arsyetim, se vetingu po funksionon.
Por në fakt nuk po funksionon ende Vetingu, por frika nga Vetingu, pasi Vetingu nuk ka nisur punë ende.
Në rastin Llalla, duhet të sqarojmë se ai nuk përjashtohet nga Vetingu pse jep tani dorëheqje. Subjekt i vetingut janë të gjithë personat e parashikuar në nenin 179/b të Kushtetutës dhe i kanë plotësuar formularët (pasuri, figurë, aftësi profesionale) brenda 30 ditëve nga hyrja në fuqi e ligjit te vetingut, që i bie të jetë para 1 viti.
Askush nuk përjashtohet nga vetingu pas kësaj.
Neni G i Aneksit Kushtetues lejon ndërprerjen e procesit te rivlerësimit (vetingut) vetëm për ata funksionarë që japin dorëheqjen, ndërkohë që janë duke e kryer detyrën. Llalla jo vetëm që nuk dha dorëheqjen, por mezi iku nga zyra pas procedurës për prokurorin e Përgjithshëm të Përkohshëm. Të gjithe ata gjyqtarë/prokurorë, që e kanë mbyllur mandatin e plotë në mënyre normale, nuk përfitojnë nga kjo dispozitë. Dhe siç e dimë të gjithë, Llalla nuk ka dhënë dorëheqjen, por e ka përfunduar mandatin në kohë.
Ai është subjekt i ligjit dhe nuk është në vlerësimin e tij përjashtimi nga vetingu. Por me sa duket, është fiksimi në kokën e tij. Ideja fikse që është ngulitur në Shqipëri, se po ike, nuk të ngacmon më askush, është arsyeja që jo vetëm opinioni publik, por dhe vetë Llalla duket sikur ndjehet i lehtësur, se nuk do të kalojë në një proces verifikimi.
Dhe këtu mendoj se përveç traditës, është koha të vlerësojmë fuqinë e procesit të Vetingut në opinionin publik, dhe gjykimin e akteve të njerëzve të drejtësisë në raport me Vetingun. Rasti Llalla është tipik, kur edhe pse ai ka bërë një gjest që ka të bëjë thjesht me të ardhmen e tij në drejtësi, njerëzit e shikojnë këtë si forcë e Vetingut. Kjo tregon se vetingu ka filluar të funksionojë, … qoftë dhe si frikë!