Thellohet lufta mes Qeverisë dhe Presidencës. Pas një heshtje disa mujore, presidenti Ilir Meta i është rikthyer lojës me dekretet. Së fundmi kreu i shtetit ka kaluar në heshtje ligjin për ratifikimin e kontratës financiare ndërmjet Këshillit të Ministrave të Republikës së Shqipërisë dhe Bankës Europiane të Investimeve, për projektin “Shtrati i lumit Lana-zhvillim urban”.
Por ky veprim i Metës tregon qartë se është rindezur konflikti mes tij dhe mazhorancës, pasi rastin më të parë presidenti e ka shfrytëzuar për të sulmuar qeverinë. Kalimi në heshtje i këtij ligji është bërë deri diku i forcuar nga kreu i shtetit, pasi duke qenë se është një ligj, i cili është në vetvete një marrëveshje, ai nuk kishte mundësi për ta kthyer për rishqyrtim në Kuvend, kështu që ka ndjekur rrugën më të shkurtër duke e kaluar në heshtje. Pra, duke qenë se marrëveshjet nuk kishin arsye për t’i kritikuar, presidenti Meta e kaloi në heshtje ligjin në fjalë. Mirëpo, rikthimi i këtyre përplasjeve, e më konkretisht loja e dekreteve, tregon qartë se qëndrimi i Metës në Presidencë, jo vetëm që do të jetë një pengesë e madhe për mazhorancën, por edhe një sfidë më vete për këtë të fundit. Madje, qëndrimi i Metës në detyrë do jetë një sfidë për mazhorancën edhe për faktin se ai mund të bëhet kërcënim për ligjet dhe ndryshimet në qeveri, emërimet e ambasadorëve, marrëveshjen me Greqinë, etj. Kështu që, mazhoranca është e detyruar që t’i shkojë deri në fund shkarkimit të presidentit Ilir Meta nga detyra.
Ja 3 hapat e PS për shkarkimin e Metës
Gazeta ka mësuar tre hapat që do të ndjekë mazhoranca për t’i shkuar deri në fund shkarkimit. Gjatë ditëve në vijim komisioni hetimor pritet të zhvillojë mbledhjen e radhës dhe si fillim pritet administrimi dhe shqyrtimi i opinionit përfundimtar të Komisionit të Venecias. Më pas sipas informacioneve, mësohet se hapi tjetër që do të ndjekë komisioni hetimor është administrimi i çdo dokumenti tjetër për të cilat komisioni vihet në dijeni dhe e gjykon të arsyeshme t’i administrojë gjatë punë së tij. Ndërsa hapi i tretë që do të ndiqet është diskutimi në lidhje me gjetjet e komisionit hetimor sipas objektit të hetimit.
Ndërkohë nga ana tjetër, sipas informacioneve, mësohet se përgjigjet që shtatë institucionet i kanë kthyer komisionit hetimor dhe thirrja e dëshmitarëve kanë kaluar në plan të dytë të punës së komisionit. Pra, tani të gjithë sytë janë kthyer nga opinioni i Venecias, i cili nuk ka shkuar ende në komisionin hetimor, pasi nuk është përkthyer akoma. Të gjitha këto dhe sidomos thjeshtimi i kohës si do të procedojë komisioni hetimor me punën e tij gjatë ditëve në vijim, tregojnë qartë se mazhoranca qeverisëse nuk kërkon të humbë kohë, duke i shkuar deri në fund nismës së saj për shkarkimin e presidentit Ilir Meta nga detyra. Kujtojmë që, Këshilli i Europës shpërndau pak ditë më parë një deklaratë për mediat, duke informuar mbi qëndrimet e Venecias për presidentin Meta. Në raport, KiE thekson se Meta veproi përtej kompetencave të tij kushtetuese, me anulimin e zgjedhjeve vendore të 30 qershorit. Në këtë kontekst, ekspertët e Venecias theksojnë se presidenti nuk mund të shtyjë zgjedhjet pa konsensus politik, duke rrëzuar kështu pretendimet e Metës se vendimin e mori në kushtet kur kishte një informacion se do të kishte gjakderdhje. /Rigels Seliman