Ish-juristit të OSHEE, avokati Romeo Kara duket se nuk i del inati me vendimin e gjykatës për të mos nisur hetimin për çështjen e CEZ, ndërsa përmes një statusi në rrjetet sociale ka shpërthyer në akuza në adresë të ish-kryeministrit Sali Berisha, të cilin e ka bërë përgjegjës për këtë aferë, por edhe për shumë ngjarje të tjera të ndodhura gjatë qeverisjes së tij.
Zoti Kara në reagimin e tij në “Facebook” akuzoi ish-kryeministrin Berisha se ai shkatërroi demokracinë në Shqipëri, qysh në fillim kur Partia Demokratike erdhi në pushtet në vitet ‘90. Sipas tij, Berisha jo vetëm që nuk ka kontribut, por ka vrarë edhe demokracinë gjatë këtyre viteve.
“Guxojnë dhe na tregojnë përralla, na thonë të pathënën: Saliu solli demokracinë. “E nxori demokracinë me dhunë, me trimëri, nga shpella e tij dhe na e solli ne”.
Medet për Saliun, medet për langonjtë e tij, medet për ne që në këtë vapë dëgjojmë pordhsihanët e trushkulurve ushtarë të veremit Sali. Njeriu jep atë që e ka, që e ka jashtë lëkurës së tij apo brenda saj. Jashtë lëkurës së tij Saliu kishte teserën e Partisë së Punës, ndërsa brenda saj kishte devocionin e komunistit, karrieristit dhe zbatuesit të porosive të Xhelil Gjonit, Ramiz Alisë, Mehmet Elezit, Bujar Hoxhës, etj.
Saliu nuk kishte asnjë lloj edukate apo tradite në drejtim të vlerave demokratike, prandaj është pikërisht ai shkaktari, që sot nuk kemi demokraci”, deklaroi ai. Më tej në reagimin e tij, teksa akuzon ish-kryeministrin Berisha se ka vrarë demokracinë në vend, juristi Romeo Kara rendit edhe disa nga ngjarjet më të bujshme që kanë ndodhur gjatë kohës që në pushtet ka qeverisur Partia Demokratike.
Sipas tij, Berisha do të mbahen mend si politikani që prodhoi “Gërdecin”, aferën e “CEZ” dhe tragjedinë e “21 janarit”. “Ai është përvetësuesi i kontributit, ëndrrës, idealit dhe djersës së një brezi të tërë studentesh dhe punëtorësh që u ngritën krah për krah për ndryshimin e vendit. Kurrkush nuk u ngrit për të dhe kurrkush nuk u ngrit prej tij.
Ka ardhur në pushtet me votë dhe ka ikur prej tij me votë dhe me shqelma. Asnjë gram heroizmi nuk ka ardhja në pushtet me votë. Le të na e tregojë ky rrumpallë dhe shpifaraket rreth tij, se cili është heroizmi i tij. Vjedhja e CEZ-it, Gërdeci, Durrës-Kukës-Morinë, rrënimi i bazës industriale, ushtrisë, arsimit, shëndetësisë, etj.
Merreni heroizmin e Saliut, këtij batakçiu dhe rrufjani dhe futjani aty ku ai e meriton. Demokracia ka humbur rrugën dhe akoma nuk ka mbërritur në destinacion”, nënvizoi ish-juristi i OSHEE, Romeo Kara.