Një mësuese nga Cërriku ka zgjedhur portalin e bashkëqeverisjes për të ndihmuar familjen e dy nxënësve të saj në vështirësi të mëdha ekonomike.
Nertila Budini në shkollën nëntë vjeçare të Cërrikut, pasi mësoi se nxënësja e saj jetonte në një banesë ku energjia elektrike mungonte prej 15 vitesh, shkroi në portalin shqipëriaqëduam.al.
Pas ankesës së saj, shqetësimi i familjes së Luan Hasës, në gjendje të vështirë ekonomike, u trajtua në kohë rekord nga zyra e OSSHE dhe sot në shtëpinë e tyre është ndezur drita e shpresës.
Mësuesja që shkroi ankesën ishte e pranishme në takimin me Kryeminstrin Rama, ku e përlotur rrëfeu se si përmes bashkëqeverisjes i kishte lehtësuar një problem nxënëses së saj.
“Mësova nga një prej nxënësve të mi, se në familjen e njërit prrej tyre nuk kishin energji elektrike prej 15 vitesh. U preka shumë dhe nuk e mendova gjatë por shkrova direkt të bashkëqeverisja. U emocionova më pas kur pashë nxënësen time të përlotur, pasi në shtëpinë e saj u kthye energjia elektrike pas 15 vitesh”, tha Mësuesja.
Ajo shprehu besimin e saj në platforma të tilla, duke pohuar se edhe vendin e punës si mësuese e kishte fituar përmes portalit “Mësues për Shqipërinë”.
Një numër jo i vogël pensionistësh i janë drejtuar platformës së bashkëqeverisjes duke u ankuar se përllogaritja e masës së pensionit të tyre nuk ka qënë e saktë.
Petrit Dyrma nga Kucova është një prej të moshuarve që shkroi në platformën shqipëriaqëduam.al, në fund të muajit Tetor, duke u ankuar se masa e pensionit të tij ishte shumë më e vogël se sa duhej të ishte.
Rasti u trajtua nga Instituti i Sigurimeve Shoqërore, i cili bëri verifikimet dhe konstatoi gabimet në llogaritjen e pensionit të zotërisë.
Prej muajit Dhjetor, qytetari do të marrë shumë e plotë të pensionit që i takon me të drejtë, por jo vetëm kaq.
I moshuari do të marrë edhe një tepricë kreditore për gjithë paratë e pensionit që nuk iu dhanë në tre vite rresht.