Mungon vetëm një udhëzim që bastet sportive online të bëhen efektive edhe ligjërisht. Ministria e Financave sqaron për Report TV se po punohet për aktin që sqaron procedurat se si do të kryhen pagesat për organizatorët apo lojtarët, por ende nuk ka një afat se kur mund të jetë gati. Ndërsa zbatimi i ligjit është ende i pamundur, ky aktivitet vijon të ekzistojë në paligjshmëri.
Prej dy vitesh, ligji për lejimin e basteve sportive online, ka mbetur në sirtar, në pritje të akteve nënligjore.
Shkak për këto vonesa shpjegon për Report TV, Ministria e Financave, është bërë kompleksiteti i lartë teknik dhe institucional i këtyre akteve, të cilat kërkojnë cikle të zgjeruara konsultimesh dhe verifikimesh, duke qenë se shumica e akteve kërkojnë ngritjen e sistemeve teknologjike dhe konsultim me Bankën Botërore.
Ministria e Financave sqaron për Report TV se deri më tani janë miratuar 6 VKM, udhëzime dhe urdhra për të lejuar lojërat e fatit, por ende nuk është gati udhëzimi ndoshta më i rëndësishëm që lidhet me pagesat.
“Për ta bërë ligjin e zbatueshëm për bastet sportive online duhet që të miratohet edhe udhëzimi “Për procedurat dhe standardet në lidhje me kryerjen e pagesave dhe mënyrën e pranimit apo tërheqjes së tyre që kryhen në përputhje me marrëveshjen specifike të organizatorit të lojës së fatit më agjentët financiarë të licencuar nga Banka e Shqipërisë”, sqaron Ministria e Financave në një përgjigje zyrtare për Report Tv.
Akti i fundit i miratuar nga qeveria ishte në mars, ku u specifikua se bastet sportive online do të mund të luhen vetëm nëse hyni në sistem me kartë identiteti, madje edhe të skanuar. Sistemet ku do të organizohen bastet do të duhet të garantojnë mekanizma për gjurmim të çdo veprimi të përdoruesit, si edhe të ketë algoritme të posaçme për llogaritje të fitimeve.
Ligji në fuqi parashikon dhënien e 10 licencave, por deri më tani asnjë nuk ka asnjë operator të licencuar, në mungesë të akteve nënligjore, të cilat duhet të ishin bërë gati brenda 6 muajve nga hyrja në fuqi e ligjit.
Por se kur mund të mbyllet ky proces, ende nuk ka një afat. Në pritje të plotësimit të ligjit edhe me këtë udhëzim, loja po vijon, por në paligjshmëri. Bastet vihen online fshehtas nëpër lokale të vogla larg syrit të autoriteteve.
Vetëm në tre vitet e fundit, janë zbuluar mbi 1200 raste të basteve të paligjshme, dhe afro 2400, është ai i personave të arrestuar, ndaluar, apo hetuar në gjendje të lirë për ushtrimin e aktivitetit të basteve.
Aksione kundër kësaj veprimtarie janë zhvilluar edhe gjatë këtij viti, disa persona kanë përfunduar në pranga, e pajisje si kompjuter apo celularë janë sekuestruar.
Deri tani janë miratuar këto akte nënligjore:
VKM nr.114, datë 27.2.2026, “Për krijimin, mbajtjen dhe funksionimin e regjistrit elektronik të personave, për të cilët është vendosur moslejimi për t’u futur në ambientet e lojërave të fatit, në faqe interneti, në aplikacione ose në platformë elektronike, ku mund të luhen lojërat e fatit, sipas kategorisë së licencuar, si dhe rregullat për paraqitjen, shqyrtimin, miratimin, anulimin apo refuzimin e kërkesës për moslejimin e personave për të hyrë në ambientet e lojërave të fatit”.
Udhëzim i Përbashkët nr. 1, datë 12.1.2026, i Ministrit të Financave dhe Ministrit të Shëndetësisë dhe Mirëqenies Sociale “Për miratimin e programeve të dedikuara për mbrojtjen e lojtarit”.
Urdhri i Ministrit të Financave nr.88, datë 03.07.2024, “Për organizimin e punës dhe të veprimtarisë së Komisionit te Licencave”.
VKM nr.309, datë 22.05.2024, “Për shpërblimin e kryetarit dhe anëtarëve të Komisionit të Licencave për lojërat e fatit”
VKM nr.151, datë 11.3.2026, “Për përcaktimin e standardeve, që kanë të bëjnë me kushtet teknike të sistemit të basteve sportive online, duke përfshirë, por pa u kufizuar, në identifikimin dhe regjistrimin e lojtarëve, kërkesat e programeve softëare dhe hardëare, certifikimin e sistemit, procedurat lidhur me faturat dhe transaksionet e pagesave, parimet e sigurisë dhe kushtet e kontrollit apo të mbikëqyrjes”.
VKM nr. 194, datë 26.3.2026, “Për përcaktimin e kritereve të vlerësimit, afateve, procedurës së konkurrimit dhe metodologjisë së pikëzimit për dhënien e licencës për kategorinë e basteve sportive online”.
Për ta bërë ligjin e zbatueshëm për bastet sportive online duhet që të miratohet edhe udhëzimi “Për procedurat dhe standardet në lidhje me kryerjen e pagesave dhe mënyrën e pranimit apo tërheqjes së tyre që kryhen në përputhje me marrëveshjen specifike të organizatorit të lojës së fatit më agjentët financiarë të licencuar nga Banka e Shqipërisë”.