Një Raport i disa ekspertëve të huaj mbi lajmet e rreme në Ballkan ka trazuar Kosovën dhe Shqipërinë. Bilushi i Metës është i pakënaqur nga raporti. Pas reagimit të Doktorit, reagoi dhe Bilushi.
Të dashur miq!
Raporti vlerëson me vërtetësi situatën e medias në Shqipëri. Ai vlerëson se shumë media të mëdha kanë raportuar lajme fallco për COVID, por raporti ka një mangësi serioze.
Ai nuk ka vlerësuar si duhet rolin e ‘qytetarit digital’, që është agjensia e lajmeve më e madhe në vend, e drejtuar nga Doktori. Fjala vjen raporti thotë që Zeni.net ka publikuar lajme fallco kurse nuk thotë që ‘qytetari digital’ ka publikuar vetëm lajme të vërteta.
Si mund t’ia mohojë Doktorit ky raport që zbuloi bashkë me LSI dhe Ilir Metën, aferën më të madhe që ka ndodhur në vend, futjen e 1500 kamionëve me lëndë helmuese nga Bari në Shqipëri.
Doktori i dokumentoi, i filmoi në portin e Durrësit e zbuloi se i kishin varrosur në Pukë. Raporti nuk thotë asnjë fjalë.
Ai hedh poshtë mundin dhe djersën e ‘Zeni.net’ dhe Doktorit si dhe e Presidentit Meta. Ai hedh poshtë mundimin e këshilltarit të Presidentit që shkoi disa herë deri në Itali për ta zbuluar këtë lajm për të cilin i kanë dhënë vetëm 25 mijë euro. Fakti që raporti nuk e përmend do të thotë që ata fshehin të vërtetën.
Mos ti zë me radhë pastaj lajmet e përditshme të ‘qytetarit digital’ që kanë tronditur vendin.
Raporti vetëm vlerëson Top Chanel si media opozitare, Klanin si media qeveritare, dhe gazetën ‘TemA’ dhe “Jeta osht qejf” si të pavarura. Kjo është gënjeshtër. Këtë nuk e pranojmë kurrë. Po të jetë për “Jeta osht qejf” Lolita ka më shumë lajme me seks se ajo, pse të vlerësohet vetëm “Jeta osht qejf”.
Po ashtu raporti e quan “Ora News” si televizion të financuar nga droga. Këto janë shpifjet e Edvin Ramës. Por sidoqoftë ne do vazhdojmë betejën tonë.
Edhe pse përpiqen ta injorojnë rolin e Doktorit në këtë histori, ai mbetet prodhuesi më i madh i lajmeve të vërteta në vend, kurse gjithë mediet e tjera gënjejnë.
Ne do ti drejtohemi me një ankesë Parlametit Europian ku ti kërkojmë të shtojë në Raport rolin e “qytetarit digital” si media më e vërtetë në vend që ka zbuluar dhe aferën më të madhe që tentoi të helmonte shqiptarët, futjen e 1500 kamionëve me lëndë helmuese në Shqipëri.
Pas kësaj do kërkojmë që hartuesit e Raportit të kërkojnë ndjesë që konsiderojnë “Temën” si gazetën e vetme investigative në Shqipëri dhe “Jeta osht qejf” si medie serioze.
Për këtë do japin llogari një ditë.