Pas hapjes së dyqanit të syzeve të Elvis Naçit dhe thirrjes së tij për mbështetje, sipas statistikave, ai ka marrë rreth 700 mijë like dhe mijëra komente.
Kjo ka ngjallur xhelozi të madhe në LSI.
Bilushi i Metës, i çuditur nga numri i madh i adhuruesve, ka bërë këto koment para gazetarëve:
“Siç keni dëgjuar, edhe sektori i bamirësisë është prekur nga sekserët.
Ne si LSI bëjmë plot akte bamirësie, por i bëjmë direkt e në popull.
Nëse dikush ka nevojë për lekë, ne i japim lekë, nëse dikush ka nevojë për ndihmë para zgjedhjeve, i japim direkt ndihmë.
Kjo natyrisht bën që bamirësia jonë të shpërndahet në mijëra njerëz dhe ta prekin vetëm ata që kanë nevojë. Ata janë dhe mirënjohës të vërtetë të akteve të bamirësisë.
Kjo që bën Vis Naçi me shokë nuk është bamirësi, por sekserllëk.
Këta mbledhin lekë nga populli që t’ua japin njerëzve në nevojë.
Kështu, këta adhurohen nga një pjesë e madhe e popullsisë, që mendojnë se këta bëjnë bamirësi, por në fakt këta bëjnë biznes.
Ja për shembull, hapja e fundit e klinikës së syzve luksoze, është biznes luksi që nuk ka lidhje me të varfërit.
Të varfërit me aq lekë sa bëjnë syzet kalojnë vitin.
Ndaj ne dënojmë fort përpjekjet për të mashtruar njerëzit me adhurues të rremë bamirësie.
Bamirës të vërtetë jemi ne që lekët tona ua japim njerëzve në dorë, jo ata që marrin lekët e popullit dhe bëjnë biznese.
Aq më shqetësuese bëhet kjo gjë, kur mendon se këtij tipit i shkon mendja të hapë dhe parti politike kur shikon gjithë ato like në Facebook.
Ky do të fitojë dhe lekë qyl dhe pushtet qyl.
Pushteti nuk merret me like në Facebok, por me lekë në dorë, me thes duke trokitur derë më derë.
Atëhere e kupton se si të firojnë ato like-t e Facebook-ut dhe lekët nga xhepat.
Ndaj distancohemi fort nga ky gjesti i hapjes së dyqanit të syzeve të shtrenjta të Vis Naçit.
Nëse do kishte hapur ndonjë fabrikë mielli, apo mencë bamirësie, do ishte ndryshe.
Bamirëse e vërtetë është LSI, që ua jep lekët apo ndihmat direkt popullit dhe nuk abuzon me to.
Është i vetmi sektor me transparencë të lartë që kemi”.