Bankat e nivelit të dytë do të lehtësojnë standardet në 3-mujorin e fundit për marrje kredie për blerje shtëpie dhe për kredi konsumatore për qytetarët.
Të dhënat jepen në raportin e vrojtimit të aktivitetit kreditues “Bankat u shprehën për një lehtësim të mëtejshëm të pritur të standardeve të kreditimit për individët, për të dyja kategoritë, në tremujorin e fundit të vitit”, thuhet në raportin e vlerësimit të Bankës së Shqipërisë.
Po ashtu, Banka Qendrore parashikon se bankat e nivelit të dytë do të rrisin kredinë për biznesin për periudhën tetor– dhjetor 2018.
Gjallërimi i kërkesës për kredi në tremujorin e fundit të vitit do të jetë, si për qëllim investimi nga ana e biznesit, por edhe për likuiditet.
“Në tremujorin e fundit të vitit, bankat presin kërkesë të gjallëruar në të gjitha kategoritë e biznesit. Kërkesa më e lartë nga ana e bizneseve në tremujorin e katërt të vitit 2018, pritet të shfaqet si për kredinë me qëllim investimi, ashtu edhe për atë me natyrë likuiditeti”, përcaktohet në raport.
Sipas të dhënave të vrojtimit të Bankës së Shqipërisë, te bizneset kërkesa për kredi u raportua më e ulët nga një tremujor më parë, si ajo e ndërmarrjeve të vogla dhe të mesme, ashtu edhe kërkesa e ndërmarrjeve të mëdha.
Edhe në prizmin e qëllimit të përdorimit të kredisë, kërkesa rezultoi më e ulët, si për kreditë për investime, ashtu dhe për likuiditete. Banka e Shqipërisë shprehet se arsyet e kërkesës së ulët të kredisë ishin mungesa e investimeve.
“Faktorët e perceptuar nga ana e bankave si përcaktues të kërkesës më të ulët për kredi ishin: nevoja më e ulët për financimin e investimeve fikse, si edhe inventarëve e kapitalit qarkullues; financimi me burimet e brendshme të vetë biznesit; besimi i biznesit; si dhe situata ekonomike dhe perspektiva e saj.
Niveli i përgjithshëm i normave të interesit, si edhe nevojat për rifinancimin e borxhit ishin dy faktorët e perceptuar si nxitës të kërkesës për kredi nga ana e bizneseve”, thuhet në raport.
Por ndryshe paraqitet situata për qytetarët në 3-mujorin që lamë pas. Kredia për qytetarët ka shënuar rritje për blerje banese, ashtu edhe për kreditë konsumatore.