Kryeministri Edi Rama ka përshëndetur vlerësimin e Departamentit Amerikan të Shtetit për ish-kreun e KED Ardian Dvorani.
Rama thotë se ky vlerësim është inkurajim i lartë për të gjithë ata që luftojnë për reformën në Drejtësi në kacafytje me të keqen.
Pas kësaj deklarate, ka ardhur dhe reagimi i fortë nga krahu ‘i djathtë’ i Ilir Metës, Tedi Blushi.
“O faqezi, Ramaforma jote ngordh më 25 prill me 3 milion shpulla dhe shkelma të shqiptarëve, kundër teje, oligarkëve dhe diplomatëve të korruptuar deri në palcë. SHQIPËRIA E PARA DHE E PAMPOSHTUR!”, shkruan Tedi Blushi.
Pak më parë, Departamenti Amerikan i Shtetit e renditi ish-kreun e KED, Ardian Dvoranin, mes 12 kampionëve kundër korrupsionit. Ky raport i DASH u duartrokit nga Edi Rama dhe Ambasada Amerikane në Tiranë.
Çmimi është bërë publik nga sekretari i Shtetit, Antony j. Blinken gjatë deklarate për mediat që ai lëshoi. Vlerësimi jepet veçanërisht për shtet që kanë pasur arritje në luftën kundër korrupsionit.
Janë vlerësuar 12 individë dhe ndërmjet tyre është edhe Dvorani, i cili aktualisht është anëtar në detyrë i Gjykatës së Lartë.
Ky vlerësim vjen si një “goditje” për Ilir Metën, pasi ishte i vetmi gjykatës që u shpreh kundër Metës ne procesin e skandalit të video-përgjimit të Dritan Priftit.