Kjo verë pritet të jetë e nxehtë për pushtetarët e lartë të korruptuar në Ballkanin Perëndimor. Gjermania dhe Shtetet e Bashkuara të Amerikës pritet të fillojnë planin që nxjerrin përfundimisht jashtë loje “non gratat”. Milorad Dodik do të jetë i pari që do t’i pritet “koka”.
Shembullin e tij, gjermanët dhe amerikanët pritet ta aplikojnë dhe tek politikanët e tjerë siç është rasti i ish-kryeministrit Sali Berisha, i cili është pjesë e “listës së zezë” së SHBA dhe Britanisë. Zhvillimet e bujshme i kanë paralajmëruar mediat e huaja.
Nga burimet e sigurta diplomatike të redaksisë boshnjako-hercegovinase N1 thuhet se Dodik po numëron ditët e fundit në fronin e entitetit serb në BeH, Republika Srpska. Diplomacia perëndimore ka vendosur që të shtrëngojë unazën rreth tij dhe përfaqësuesi i lartë i komunitetit ndërkombëtar, Christian Schmidt, mund ta largojë atë nga posti i kreut të RS, duke përdorur kompetencat e tij.
Përveç kësaj, media boshnjake ka zbuluar dhe kartat që do të përdoren për “non gratat” që kalojnë vijat e kuqe, si rasti i Dodik apo dhe i Sali Berishës, të cilët nuk tërhiqen nga skenarët destabilizues dhe mbajnë vendin akoma në të shkuarën.
Përjashtimi përgjithmonë nga politika
Si fillim, komuniteti ndërkombëtar pritet të fillojë procedura të forta për personazhet që rrezikojnë sigurinë e Ballkanit. Nga shkarkimi nga çdo funksion, te ndalimi i kandidimit për zgjedhje, bllokimi i aktiviteteve politike dhe në fund deri tek kërcitja e prangave. Gjermania po kërkon si fillim largimin e Dodikut, si ngatërrestari më i madh jo vetëm në BeH, por edhe në rajon.
Përveç shkarkimit, Schmidt po shqyrton edhe mundësinë e një ndalimi të përhershëm ose shumëvjeçar të aktiviteteve politike të Milorad Dodik, që do të nënkuptonte se ai nuk do të lejohej më të kandidojë në zgjedhje apo të zhvillojë asnjë aktivitet politik.
Përveç kësaj, media gjermane, siç thotë Deutsche Ëelle në komentin e saj, parashikon arrestimin e zyrtarëve që shpërfillin rregulloret e OHR-së si vendime të Schmidt. Ky i fundit kërcënoi këdo që nuk i bindej dispozitave të tij se mund të përballeshin me akuza penale, të cilat do t’i kushtonin nga gjashtë muaj deri në pesë vjet burg.
Izolimi i “non-gratave”
Nëse nuk funksionojnë të gjitha këto procedura, media boshnjake paralajmëron se karta e fundit e gjermane do të jetë ajo e izolimit total të “non gratave”. Në shkrimin e tyre thuhet se Brukseli në fund do të ndjekë të njëjtën linjë si Shtetet e Bashkuara të Amerikës dhe Mbretëria e Bashkuar për mundësinë për të marrë sanksione për politikanët apo individët e përfshirë në korrupsion madhor apo minimin të demokracisë.
SHBA-të dhe Britania e Madhe, të cilat dikur vendosën edhe sanksione ndaj tij, ndërsa Brukseli qëndronte i përmbajtur (nuk mund të pajtoheshin) por duket se BE-ja tani është gati të mbështesë këtë iniciativë. Nëse Bashkimi Europian do të miratojë vendosjen e non gratave, duket se ish-kryeministri Sali Berisha do të izolohet edhe më shumë, pasi mund ta presë sërish i njëjti fat.
Ai mund të shpallet non grata edhe nga Evropa, pasi Britania e Madhe dhe SHBA e kanë futur atë në listën e zezë me argumentin se ka minuar demokracinë dhe për korrupsion. Pra ditët e zeza për personazhet “non grata” pritet të fillojnë tani dhe masat nga Perëndimi siç i lexoni janë më të ashpra se kurrë./Elmas Bogdani