Roland Bejko, ka kërkuar nga SPAK që të nisin hetimet për ish-kryeministrin Sali Berisha. Ky i fundit u shpall “non grata” që në muajin maj nga Shtetet e Bashkuara të Amerikës, por ende nuk ka lëvizje nga organi i akuzës. Por sipas Bejkos, hetimet për Berishën duhet që të kishin nisur me kohë.
Ai u shpreh se autoritetet duhet të ishin vënë në lëvizje dhe nëse nuk kanë materiale do të jenë Shtetet e Bashkuara të Amerikës që do të sjellin informacion për Berishën. I pyetur a duhet të nisin hetimet nga SPAK për Berishën ai tha: “Duhet të ishin vënë në lëvizje institucionet në Shqipëri, pasi është nënshkruar dhe nga zv. ndihmës sekretari amerikan.
Escobar tha se drejtësia duhet të kishte vepruar dhe nëse s’kanë material do të jetë SHBA që do të vërë në dispozicion”, tha ai në një intervistë dje.
I pyetur në lidhje me ultimatumin drejtuar liderit demokrat Lulzim Basha se ky i fundit duhet që të lërë zyrën në 5 janar, Bejko u shpreh se Partia Demokratike duhet të veprojë në mënyrë demokratike dhe të presë një vendim të gjykatës, pasi ultimatume të tilla që bën Berisha, nuk janë zgjidhje. Ai theksoi se Berisha nuk mund ta marrë dot Partinë Demokratike me ultimatum.
“Që nga dita që dëgjova për këtë ultimatum, fillova të lexoja romanin “Kështjellat” dhe këto situata qesharake ndodhin në parti ku kanë mbaruar së funksionuari parimet bazë. Do të doja që Partia Demokratike duhet të ishte perëndimore dhe si e tillë do të funksiononte në mënyrë legale.
Në këto kushte zgjidhja më e mirë do të duhet të priste vendimin e gjykatës dhe nëse pranoheshin dhe nëse jo do të quhej një aktivitet informal dhe sipas statutit bëhet nul. Duhet të pritej nga Berisha që të mos bënte ultimatume të tilla qesharake. Ne mendojmë që Partia Demokratike nuk ka luksin të ketë një njeri “non grata” në krye”, tha ai.
Bejko: Gjykata duhet të marrë vendimin për dy statutet
Ndërkohë, ai anëtari i Këshillit Kombëtar të Partisë Demokratike Roland Bejko, foli edhe mbi dy statutet që janë dorëzuar në gjykatë nga të dyja palët dhe pritet një vendim. Ai theksoi, se nëse gjykata do të jetë e pavarur do të marr një vendim. “Nëse gjykata do të jetë e pavarur do të marrë një vendim.
Berisha e di që do të marrë një përgjigje negative. Nëse Berisha ka vendosur ta zgjidhë me gjak dhe nëse ndodh gjë në 5 janar do të jetë turpi i Berishës. Do vijnë të na qëllojnë ne dhe demokratëve, ta zgjidhi në mënyrë legale. Me ultimatume dhe kode zakonore kreshnikësh nuk zgjidhen. Këtu jemi në demokraci”, tha ai. I pyetur lidhur me hartën e re territoriale, kur do nisi puna dhe çfarë duhet të ndryshojë, ai tha se reforma territoriale është një nga sfidat e PD. Bejko theksoi, se do të bëhet rishikimi i shërbimeve.
“PD ka një nga sfidat e veta reformën territoriale. Ajo që do të ndryshojë është rishikimi jo thjeshtë i hartës, por edhe për shërbimet si çështje të zhvillimit ekonomik. Për pasojë për mungesë të këtyre politikave kemi braktisje të periferive për shkak të kushteve dhe shërbimeve”, tha ai.