Kontrolli i Lartë i Shtetit pritet të shkaktojë përplasjen e radhës midis Qeverisë dhe Presidencës. Presidenti i Republikës Ilir Meta, propozoi ditën e djeshme si kryetare të KLSH, Vitoren Tushën, e cila momentalisht është anëtare e Gjykatës Kushtetueses.
Pak ditë më parë u bë publike lista me 34 emra që kandidonin për të marrë drejtimin e Kontrollit të Lartë të Shtetit. Midis tyre, kishte edhe një sërë emrash të afërt me Metën, por mesa duket kreu i shtetit ka vendosur të përzgjedhë Vitore Tushën. Një gjë e tillë u bë e ditur dje nga vetë Presidenca përmes një njoftimi për shtyp.
Por kush është Vitore Tusha? Momentalisht anëtare e Gjykatës Kushtetuese dhe të Këshillit të Emërimeve në Drejtësi, Vitore Tusha njihet si një mike e afërt e kryetares së LSI, Monika Kryemadhit, ndërsa ka edhe miqësi me familjen e Sali Berishës, veçanërisht vajzën e tij, Argita Berisha.
Duhet theksuar fakti që Meta, përmes propozimit të Vitore Tushës në krye të KLSH i jep goditje finale Gjykatës Kushtetuese dhe Këshillit të Emërimeve në Drejtësi. Në të dy këto institucione Tusha është anëtare, por të dy organet kanë shumë pak anëtarë.
Gjykata Kushtetuese, me largimin e Tushës mbetet vetëm me kryetarin Bashkim Dedja, ndërsa KED mbetet vetëm me 3 anëtarë.