Përveç politikës edhe Prokuroria e Posaçme është vënë në lëvizje për të siguruar hapjen e negociatave. Një ndër kushtet kryesore të Bashkimit Europian është lufta kundër krimit të organizuar dhe korrupsionit dhe kush më mirë se Struktura e Posaçme Antikorrupsion mund të flasë për këtë çështje.
Ditën e djeshme prokurorët e SPAK nën udhëheqjen e Zef Mazit zbarkuan në Berlin, në kuadër të një vizite dy ditore. Skuadra e SPAK së bashku me zëvendësministrin e Drejtësisë Klajd Karameta, zëvendësministrja e drejtësisë, Adea Pirdeni, zëvendësministrja e Brendshme Romina Kuko, zëvendësministri i Brendshëm, Besfort Lamallari dhe Julian Hoda, gjithashtu zëvendësministër në Ministrinë e Brendshme ndodhet në Gjermani ku nën udhëheqjen e Zef Mazit do të japin llogari në Berlin për ngritjen e BKH-së dhe luftën ndaj krimit të organizuar.
Sipas informacioneve të gazetës, bëhet me dije se kreu i SPAK Arben Kraja së bashku me delegacionin do të japin llogari për bilancin e punës që kanë bërë deri tani, sa është numri i personave që janë hetuar apo janë nën hetim nga Prokuroria e Posaçme të cilët janë të akuzuar për krim të organizuar dhe korrupsion në nivele të larta.
Ato do të raportojnë përpara mazhorancës, opozitës gjermane, ministrit të Jashtëm dhe këshilltarëve të kancelares Angela Merkel mbi ecurinë e institucioneve të drejtësisë në kuadër të integrimit të Shqipërisë. Pra në këtë mënyrë duket se SPAK ka çuar në Berlin “një listë” të qartë me emrat e kriminelëve apo edhe zyrtarëve të lartë që janë në hetim.
Po ashtu burimet bëjnë me dije se Angela Merkel ka marrë në patronazh luftën antikorrupsion dhe prokurorët e SPAK pritet që të marrin udhëzime konkrete nga Gjermania për mënyrën se si të luftojnë krimin e organizuar dhe korrupsionin në nivele të larta, duke i dhënë kështu një shpresë Shqipërisë për hapjen e negociatave me Bashkimin Europian.
Pra, nëse hetimi dhe çuarja para drejtësisë i zyrtarëve të lartë të cilët janë të përfshirë në afera korruptive dhe krim të organizuar bëhet realitet, atëherë pritet një dritë jeshile për vendin tonë, duke plotësuar një nga kushtet më të rëndësishme të BE përpara konferencës së parë ndërqeveritare.
Ja progres-raporti i KE
Në progres-raportin e Komisionit Europian vlerësohet pozitivisht procesi i vetingut, proces i cili kontrollon pastërtinë e figurës së gjyqtarëve dhe prokurorëve, pasurinë dhe profesionalizmin e tyre. Më shumë se 286 dosje janë përpunuar deri më tani, duke shkaktuar në 62% të rasteve shkarkime, kryesisht për çështje që lidhen me pasuri të pajustifikuara.
Në raport theksohet se pavarësisht se numri i hetimeve ndaj gjyqtarëve dhe prokurorëve është i lartë, dënimet ndaj zyrtarëve të nivelit të lartë mbeten të kufizuara. Komisioni Europian vlerësoi se korrupsioni mbetet i përhapur dhe është një shqetësim serioz, por autoritetet, thuhet në raport kanë forcuar kapacitetet operacionale, koordinuese dhe monitoruese në luftën kundër korrupsionit.
“Shqipëria ka bërë progres të mirë në forcimin e luftës kundër krimit të organizuar, operacionet policore për shpërbërjen e organizatave kriminale janë intensifikuar, po ashtu edhe lufta kundër kultivimit dhe trafikimit të lëndëve narkotike. Një tjetër pikë pozitive në raport është edhe lufta ndaj terrorizmit dhe lufta kundër pastrimit të parave të pista”, thuhet më tej në raport.