I ktheu hotelin Balilit, Erion Riçku katapultohet në krye të Doganës së Tiranës, aksioner në një kompani transporti në konflikt interesi, aferat korruptive që sfidojnë SPAK-un
Burime brenda sistemit doganor dhe administratës, kanë bërë me dije për “Pamfleti”-n skemën e përdorur nga qeveria dhe drejtuesit e Doganës së Përgjithshme për të vendosur “urithin” Erion Riçku në krye të degës doganore të Tiranës, pa asnjë garë reale dhe duke shkelur të gjitha procedurat e rekrutimit. (Kujtojmë që Erion Riçku, aksioner në një kompani transporti në konflikt intetesi, kur ishte drejtor i Shërbimeve Mbështetëse pranë Agjencisë së Pasurive të Sekuestruara, i ka kthyer resortin “Santa Quaranta” krye trafikantit Klement Balili, resort i sekuestruar nga drejtësia).
Fakti është ky: Në faqen zyrtare të Departamentit të Administratës Publike është publikuar Shpallja nr. 7568 për Kryetar të Degës Doganore Tiranë. Por kjo nuk është një garë e vërtetë. Është një punë e mbaruar më parë, e qepur fiks për Erion Riçkun. Procedura bëhet vetëm sa për sy e faqe, për t’i dhënë një palë letra të rregullta një vendimi të marrë në hije.
Këtë e tregojnë hapat kronologjikë.
Së pari, rreth një muaj para se të hapej shpallja, Erion Riçku transferohet në pozicionin e Përgjegjësit të Sektorit të Apelimit dhe Ankimimit pranë Drejtorisë së Përgjithshme të Doganave. Një lëvizje paralele, pa konkurs, pa bujë.
Së dyti, menjëherë pas këtij transferimi, ai caktohet Kryetar i Deleguar i Degës Doganore Tiranë. Pra, pa asnjë garë, ai tashmë po drejton degën më të madhe doganore të vendit, aty ku kalon pjesa dërrmuese e importeve dhe eksporteve shqiptare.
Së treti, vetëm pasi e kanë ulur tashmë në karrige, hapet Shpallja nr. 7568, për ta bërë këtë pozicion të përhershëm. Fillimisht e vendosin në detyrë, pastaj hapin garën që ta bëjnë me letra të rregullta.
Por pjesa më skandaloze është kjo. Procedura në letër thotë se fillimisht bëhet një lëvizje paralele dhe vetëm në fund ngritje në detyrë. Në realitet, për këtë lëvizje paralele nuk ka asnjë kandidat tjetër.
Si është e mundur që për degën më të madhe doganore në Shqipëri, për Doganën e Tiranës, ku kalon pjesa më e madhe e bizneseve të vendit, të mos ketë asnjë konkurrent përballë Erion Riçkut? Një i sapoardhur në doganë, pa një karrierë të gjatë atje, por që papritmas bëhet i vetmi kandidat.
Kjo mungesë totale e kandidatëve në lëvizjen paralele vetëm sa e konfirmon atë që të gjithë e dinë brenda sistemit: gara është një farsë. Riçku është vendosur atje me pazare klienteliste, jo me meritë.
Dhe gjithë kjo ndodh ndërkohë që Riçku është i ngarkuar me pesë afera të mëdha nga e kaluara e tij në Agjencinë e Pasurive të Sekuestruara. Por askush nuk e ndalon. Përkundrazi, i hapet rruga për në krye të doganës.
Pyetjet që lindin janë të thjeshta:
Pse nuk pati asnjë kandidat tjetër për të konkurruar me Riçkun?
Kush e vendosi që ai të bëhej Kryetar i Deleguar para se të hapej konkursi?
Pse procedura e lëvizjes paralele u bë një formalitet i zbrazët?
Dhe më e rëndësishmja: kush e mbron Riçkun nga lart?
Prapaskenat/ Si ia “qepën kostumin” Erion Riçkut
Nëse keni dyshime, prisni datën 18 prill. Atëherë do të shihni nëse gjithçka që po ndodh do të konfirmohet në praktikë.
Deri kur do të vazhdojë kjo tallje me administratën publike?
Deri kur do të vendosen në karrige njerëzit e lidhur me afera, ndërkohë që procedurat shkelen hapur?
Aksioner në kompani transporti
Ndërkohë që drejton Doganën e Tiranës, Erion Riçku rezulton ortak me 15% në shoqërinë “RISKU” sh.p.k., e cila merret me import-eksportin e materialeve të ndërtimit, pajisjeve elektrike, artikujve ushqimorë, automjeteve dhe karburanteve.
Burime brenda sistemit doganor dhe ish-punonjës të Agjencisë së Pasurive të Sekuestruara, kanë bërë me dije për “Pamfleti”-n, skemën e përdorur nga “urithi” Erion Riçku, sot Drejtor i Doganës së Tiranës, por më parë shef i Shërbimeve Mbështetëse e de-facto Zv/drejtor i Përgjithshëm në Agjencinë e Pasurive të Sekuestruara, për të vjedhur miliona euro duke shfrytëzuar detyrën dhe duke ndërthurur interesin privat me atë publik.
Fakti është ky: Erion Riçku është sot drejtor i Doganës së Tiranës. Në të njëjtën kohë, nga të dhënat e regjistrit tregtar, ai rezulton ortak me 15% në shoqërinë “RISKU” sh.p.k., me NIPT K47116701A. Kjo shoqëri ka si objekt aktiviteti import-eksportin, tregtimin e materialeve të ndërtimit, pajisjeve elektrike, artikujve ushqimorë, automjeteve e karburanteve. Pra, pikërisht ato mallra që kalojnë çdo ditë nga dogana ku ai është drejtor.
Ricku, duke qenë ortak në një firmë që merret me import, ndërkohë që mban pozicionin më të lartë në Doganën e Tiranës, krijon një ndërthurje të qartë të interesit privat me detyrën publike. Kjo përbën konflikt interesi, të paktën në formë potenciale, sipas ligjit nr. 9367/2005 “Për parandalimin e konfliktit të interesave në ushtrimin e funksioneve publike”. Por askush nuk e ka hetuar deri më sot.
Më keq akoma, sipas Urdhrit të Ministrit të Financave nr. 251, datë 07.11.2022, çdo drejtues i degëve doganore duhet të pajiset me certifikatë sigurie CSP, niveli “Sekret”. Megjithatë, burimet tregojnë se emërimet në doganat kryesore Tiranë, Durrës, Kakavijë janë bërë pa asnjë konkurs, as edhe formal sa për letra, dhe pa asnjë kriter profesional apo sigurie. Janë vendosur në detyrë njerëz për arsye klienteliste dhe përfitime financiare. Qëllimi i tyre është vetëm të lulëzojë kontrabanda, të lehtësohet kalimi i mallrave kineze, furgonëve me mallra Anglia, telefonave celularë e gomave të përdorura, të cilat kalojnë pa kontroll ditë e natë.
Vendet e punës në doganë janë kthyer në një “pazar”, ku emërimet dhe qëndrimi në detyrë lidhen me pagesa, gjoba, favore dhe bindje politike. Dhe në qendër të këtij pazari është “urithi” Erion Riçku, i përfolur për korrupsion, shfrytëzim të zyrave të shtetit për interesa private dhe mbushje xhepash.
Por aferat e Riçkut nuk nisin nga dogana. Ato vijnë nga një kohë e mëparshme, kur ai ishte brenda Agjencisë së Pasurive të Sekuestruara. Dhe atje lista është e gjatë.
AFERA 1: Rasti Luan Spahiu, trafikanti i kokainës me 58 pasuri që “avulluan”
Gjykata e Krimeve të Rënda urdhëroi dy administratorët Arjan Baçi dhe Erion Riçku, të Agjencisë së Pasurive të Sekuestruara, të bllokojnë 58 pasuri të paluajtshme dhe të gjitha llogaritë bankare në emër të Luan Spahiut, babait të tij Hamit, dy fëmijëve Fabian e Luisa, dhe bashkëshortes kolumbiane Sandra Patricia Spahiu.
Luan Spahiu, trafikant kokaine i dënuar nga gjykata gjermane e Frajburgut me 5 vite burg, ishte shndërruar në biznesmen ndërtimi në Shqipëri. Por pavarësisht sekuestros së vendosur në zyrën e hipotekës Tiranë, rezulton se pjesa dërmuese e këtyre pasurive ishin tjetërsuar tashmë. Ato ishin shitur tek persona të tjerë.
Pyetja që hedh “Pamfleti”-n është e thjeshtë: a e zbatuan Riçku dhe Baçi me kohë urdhrin e bllokimit, apo vonesa ishte e qëllimshme për t’i dhënë kohë trafikantit të kokainës të shpëtonte pasuritë? Vlera totale e pronave të sekuestruara të Spahiut arrinte në rreth 10 milionë euro. Ky rast tregon se Riçku nuk ishte thjesht një administrator. Ai administronte një portofol të gjerë pasurish të sekuestruara të trafikantëve ndërkombëtarë.
AFERA 2: 46 milionë Euro pasuri të sekuestruara në Laprakë që shteti nuk i preku
Baterdia e Erion Riçkut me grupin e tij në pasuritë e sekuestruara të një bande droge dhe të biznesmenëve mafioz në Tiranë. Mes tyre figuronin 46 milionë Euro pasuri të sekuestruara në Laprakë, me Vendim Nr. 768, datë 05.06.2015 të Gjykatës së Tiranës, nga 3 biznese.
Por xhambazi Erion Riçku dhe grupi i tij nuk e zbatuan këtë vendim kundrejt përfitimeve. 46 milionë Euro pasuri mbetën aty, në administrim të bandave, ndërsa shteti nuk pa asnjë cent. Nëse ky fakt konfirmohet plotësisht, kemi të bëjmë me një dëshmi direkte se Riçku e përdorte pozicionin e tij për të mos zbatuar urdhra gjyqësorë sekuestrimi, duke favorizuar bandat kriminale.
AFERA 3: Zhdukja e 24 automjeteve të sekuestruara
Kontrolli i Lartë i Shtetit (KLSH) zbuloi se Riçku kishte zhdukur 24 automjete të sekuestruara gjatë kohës që ishte në detyrë pranë Agjencisë së Pasurive të Sekuestruara. Kjo gjetje e KLSH-së është serioze sepse automjetet e sekuestruara janë prova materiale nën ruajtjen e shtetit. Zhdukja e tyre përbën potencialisht veprën penale të shpërdorimit të detyrës dhe shkatërrimit të provave. Por mashtruesi Erion Riçku nuk u arrestua kurrë për këto 24 automjete.
AFERA 4: Vjedhja e 3.3 milionë Euro nga qiratë e pasurive
I njëjti raport i KLSH-së zbuloi se Riçku kishte vjedhur 3.3 milionë Euro nga qiratë e pasurive të sekuestruara. Kjo shumë është e veçantë. Bëhet fjalë për qiratë që Agjencia merrte nga palët e treta për pasuritë nën administrim. Riçku, si Shef i Shërbimeve Mbështetëse, kontrollonte flukset financiare dhe raportimin. Ai deklaronte vetëm një pjesë të qirave dhe pjesën tjetër e kanalizonte në xhepin e tij.
Dhe këtu hyn në lojë Luan Abazi, Sekretari i Përgjithshëm i Prokurorisë së Përgjithshme. Sipas burimeve, Luan Abazi, gruaja e të cilit (Leze Abazi) ka studio ligjore që ka punuar për Riçkun, e ka shpëtuar disa herë urithin nga burgu. Kur KLSH zbuloi vjedhjet, kur mediat shkruan për zhdukjen e 24 automjeteve, Abazi ndërhyri dhe procedimet penale ngecën.
Erion Riçku nuk është thjesht një drejtor dogane por nyja lidhëse mes administratës së sekuestrimeve, doganës, biznesit privat dhe prokurorisë. Konflikti i interesit i tij është i dukshëm. Aferat që e rëndojnë janë të shumta: 58 pasuritë e Luan Spahiut, 46 milionë Eurot në Laprakë, 24 automjetet e zhdukura, 3.3 milionë Eurot e qirave. Dhe gjithmonë në pazar me shefat e prokurorisë.
Deri kur do të vazhdojë Erion Ricku të drejtojë doganën, ndërkohë që firma e tij importon mallra? Deri kur SPAK-u do të rrijë duarkryq, ndërsa Luan Abazi e mbron atë?
NË VIJIM do publikojmë evidenca, për batërdinë që po bën Erion Riçku me grupin e tij në doganën e Tiranës, për firmat e tij fantazmë, për lidhjet me kontrabandistët dhe për mënyrën se si ka manipuluar certifikatat e sigurisë…/Pamfleti