Edi Rama dhe Ilir Meta duket se po shkojnë drejt një pakti të ri. Pavarësisht përplasjeve, debateve, akuzave dhe mosmarrëveshjeve, në politikë kurrë nuk thuhet kurrë. Në 2011 Rama-Meta ishin dy armiq të betuar (publikimi i videos Meta-Prifti), por më pas ujërat u qetësuan dhe në 2013 PS dhe LSI shkuan bashkë në zgjedhje.
Ditët e fundit po jepen sinjale se mazhoranca dhe presidenti kanë gjetur një akord të ri. Krejt pa pritur marrëdhëniet Rama-Meta kanë ndryshuar, pasi sulmet janë ndalur dhe palët po bëjnë lëshime ndaj njëri-tjetrit. Rasti më i freskët është ai i Kontrollit të Lartë të Shtetit.
PS pranoi kandidaturën e Arben Shehut dhe pavarësisht se shumë deputetë ishin kundër, të gjithë u porositën të votojnë pro, pasi ishte arritur konsensusi mes Ramës dhe Metës. Nga ana tjetër, Meta ka ndalur sulmet dhe akuzat ndaj shefit të qeverisë. Sipas zërave në korridoret e politikës, palët po shkojnë drejt një pakti ku përfshihen një sërë çështjesh. E para është reforma në drejtësi.
Meta e Ruçi bënë një takim për t’u koordinuar për emërimet në Gjykatën Kushtetuese. Ndërkohë pas takimit me Metën, Ruçi i dha ultimatum KLGJ-së që të plotësojë vakancat në Gjykatën e Lartë. Pra duket se kemi një pakt për të ridimensionuar emërimet në Gjykatën e Lartë dhe Kushtetuese, duke përdorur si argument Komisionin e Venecias. Ardian Dvorani ishte kurbani i parë. Pas urdhrit të Metës ai u shkarkua duke dhënë sinjale se diçka po gatuhej. Shkarkimi i tij duket se ishte produkt i paktit të ri. Tjetër element është se presidenti do i shpëtojë shkarkimit. PS e ka harruar totalisht komisionin hetimor.
Sipas burimeve, ka një tërheqje totale dhe deputetët nuk janë njohur as me raportin e Venecias, ndërsa nuk ka asnjë sinjal për të zhvilluar mbledhjen e radhës. Pra PS duket se po tërhiqet nga shkarkimi i Metës dhe kjo duket se është sërish pjesë e pazareve. Por gjithë lufta që ka bërë Meta kohët e fundit nuk ka qenë për të marrë kreun e KLSH apo dy anëtarë në Kushtetueses. Lufta e presidentit është me reformën në drejtësi, pasi ai është ndër politikanët më të rrezikuar.
Duke shtyrë shkarkimin e Metës, kemi një amnisti ndaj tij sa i takon reformës, pasi presidenti nuk hetohet dot. Meta u bë president pikërisht për të shmangur çdo lloj akuze nga SPAK, por organet e drejtësisë u vonuan, planet ndryshuan dhe presidenti vijon të kërkojë garanci. Nga ana tjetër, qeveria do të miratojë një ligj për amnistinë fiskale dhe do u mundësojë të gjithëve të justifikojnë paratë. Edhe pse thuhet se politikanët nuk do përfshihen, ata mund të përdorin palë të treta dhe dalin të larë në këtë mes.
Koalicioni mes PS dhe LSI
Në korridoret e politikës po flitet çdo ditë e më shumë se PS dhe LSI do të jenë bashkë në zgjedhjet e ardhshme. Edhe pse kryeministri ka thënë se e përjashton si mundësi koalicionin, sinjalet janë se palët e kanë gjetur akordin për të zyrtarizuar një koalicion të ri, i cili duket se i kënaq të gjithë. Rama do të ketë mundësinë të marrë një mandatë të tretë. PS duket se do me ngulm një tjetër mandat, por duke qenë se qeverisja është konsumuar do jetë shumë e vështirë dhe sinjalet janë se LSI mund të bëjë sërish rolin e “Xholit”.
Nga ana tjetër, Meta mund të marrë një tjetër mandat si presidenti. Në këtë mënyrë Meta përfiton një tjetër amnisti 5-vjeçare nga drejtësia. Një tjetër element është dhe Banka e Shqipërisë, pasi nuk përjashtohet si mundësi që të kemi një ndryshim të Guvernatorit, pasi ashtu si me KLSH, edhe Banka e Shqipërisë kërkon konsensus mes kryeministrit dhe presidentit.
Pra sinjalet janë se Rama-Meta po shkojnë drejt një marrëveshje të re, e cila mund të sjellë shumë zhvillime të forta në politikë. LSI është me PD dhe të shumtë janë demokratët që ja kanë frikën se mund ta dredhë para zgjedhjeve. Mbetet të shihet se çfarë do prodhojë vjeshta. Por e sigurt është që në fund të prillit apo fillim të majit kemi zgjedhje dhe në prapaskenë po punohet fort për aleancat e reja./Kliti Topalli