Gjykata Kushtetuese do t’i rikthehet sot normalitetit, pas gati 3 vitesh bllokim. Vetingu shkarkoi pjesën dërrmuese të anëtarëve dhe kjo gjykatë mbeti vetëm me Vitore Tushën duke mos pasur kuorumin e nevojshëm për shqyrtimin e çështjeve. Falë presionit amerikan, në dhjetor numri i anëtarëve të rinj shkoi në 6 (7 bashkë me vitore Tushën që ishte), duke krijuar numrat e nevojshëm për mbajtjen e seancave.
Sot do të zhvillohet seanca e parë dhe në rend dite është një kërkesë e Gjykatës së Tiranës me objekt: “Shfuqizimi si i papajtueshëm me Kushtetutën e Republikës së Shqipërisë i togfjalëshit “nga gjykata e shkallës së parë që ka dhënë vendimin në dhomën e këshillimit”, parashikuar në pikën 1 të nenit 453 të Kodit të Procedurës Penale, si dhe togfjalëshit “… i së njëjtës gjykatë”, parashikuar në pikën 3 të nenit 453 të Kodit të Procedurës Penale, të ndryshuar me ligjin nr. 35/2017.
Për Kushtetuesen është bërë një betejë e fortë politike dhe tashmë gjyqtarët janë në test pasi kanë në dorë shumë dosje sensitive. Ata janë emëruar nga Kuvendi e Presidenca dhe këto institucione shumë shpejt do përballen në gjykatë. Gjyqtarët mbetet të shihen nëse do zbatojnë ligjin apo do i qëndrojnë besnikë institucioneve të emërtesës.
Zgjedhjet vendore
Janë 25 çështje të bëra gati, që do të shqyrtohen nga gjashtë anëtarët e Gjykatës Kushtetuese. 32 të tjera presin për mbledhjen e gjyqtarëve, më e rëndësishmja e të cilave është padia e shoqatës së bashkive, që kërkojnë shpalljen si antikushtetuese të zgjedhjeve të 30 qershorit 2019, të cilat në atë kohë u kthyen në një front grindjesh politike.
Gjyqtarët kushtetues do të testohen edhe me ankesa si ajo e kryeministrit kundër presidentit Ilir Meta, i cili pasi refuzoi të dekretonte Gent Cakajn si ministër të Jashtëm, u padit në Gjykatën Kushtetuese nga kreu i qeverisë, që kërkon zgjidhjen e mosmarrëveshjes së kompetencave dhe interpretim të nenit 1 të Kushtetutës. Sa i takon padisë për zgjedhjet vendore, ajo nuk parashikohet të shqyrtohet as brenda shkurtit, çka do të thotë se Kushtetuesja do të marrë dhe më shumë kohë.
Por problemi është se me 7 anëtarë me shumë gjasë shumica e dosjeve mund të mbesin pa vendim, përfshirë dhe ajo e zgjedhjeve, pasi duhet që të kemi rezultat 5 me 2. Nëse ndodh që 3 anëtarë nuk janë të këtij mendimi atëherë nuk merret dot vendim. Për këtë arsye sytë të gjithë janë te Gjykata e Lartë, pasi ajo duhet të emërojë 3 emrat e tjerë të Kushtetueses duke krijuar kuorumin e parashikuar në ligj prej 9 anëtarësh.
Më 4 shkurt mbledhja e radhës
Mbledhja e radhës e Kushtetueses do të jetë në 4 shkurt ku do të shqyrtohet kërkesa e Shoqatës Kombëtare Pronësi dhe Drejtësi. Në padi kërkohet shfuqizimi si i papajtueshëm me Kushtetutën i disa neneve në ligjin “Për trajtimin e pronës dhe përfundimin e procesit të kompensimit të pronave”, në ligjin “Për trajtimin e kërkesave përnjohje të pronës”, si edhe dy VKM-ve për mënyrën e kompensimit financiar të pronave.
Të premten, Kushtetuesja vendosi të kalojë në seancë plenare edhe një ankim të mbërritur nga Gjykata e Apelit Tiranë, ku pretendohet si antikushtetues një prej neneve të ligjit “Për trajtimin e pronës”. Në pranverën e vitit që lamë pas mazhoranca miratoi ligjin e ri të pronave, i cili sipas saj i jep një herë e mirë fund problemeve të kompensimit. Por ai kundërshtohet nga ish-pronarët.
Me këtë ligj parashikohet një afat deri më 2028 për përfundimin e regjistrimit të tokave të ndara sipas ligjit 7501. Një tjetër aspekt është trajtimi i ndërtimeve informale, ku ata që kanë një pronë pa leje në një zonë ku do të kalojë një projekt publik, tashmë do të dëmshpërblehen financiarisht ose me programet e strehimit. Ndërtimet pa leje që nuk legalizohen do të marrim dëmshpërblim nga qeveria.