Teksa u ndal te ftesa zyrtare që i ka dërguar kryeparlamentarit Gramoz Ruçi për takim urgjent, Presidenti Ilir Meta tha gjatë bashkëbisedimit me gazetarët se Shqipëria nuk do të kishte mbetur asnjë sekondë pa Gjykatë Kushtetuese, nëse ky takim nuk do të ishte minuar më herët.
Gjithashtu, Kreu i Shtetit u shpreh se nëse një gjë e tillë do të kishte ndodhur, as opozita nuk do ta kishte braktisur Parlamentin, si dhe do të ishin çelur negociatat e Shqipërisë me BE.
“Nuk kemi çfarë te negociojmë, duhet të bashkëpunojmë. Por duhet të parandalojmë problemet me shortin në KED, me legjitimitetin e KED dhe me bllokimin e këtij institucioni. Nëse nuk do të ishte minuar ky takim më herët, Shqipëria asnjë sekondë s’do të kishte mbetur pa Gjykatë Kushtetuese funksionale.
Madje, opozita s’do të kishte pasur asnjë lloj pretendimi për t’u larguar nga Parlamenti, pasi do ta kishte rrugën për të shkuar në Kushtetuese, por edhe negociatat do të ishin çelur me kohë. E kam thënë dhe më parë që ne po lëmë nam me Gjykatën Kushtetuese, pasi ka qenë kusht ngritja e saj.”, u shpreh Meta.