Shumë demokratë sot u surprizuan kur morën vesh se kandidatët që ata zgjodhën në primare do ishin zyrtarisht kandidatë të LSI.
Meqë Doktori s’ka formuar akoma parti dhe meqë duhen dy parti të quhet koalicion, Doktori ka ofruar Arjan Starovën me partinë e tij, që të mos ngeleshin vetëm të LSI.
Për të shuar kuriozitetin e demokratëve se si Ilir Meta pranoi të merrte kandidatët e Doktorit, Muli bëri këtë sqarim:
“Të dashur demokratë!
Nuk ka ndonjë surprizë në partinë e re që po formojmë.
Është e vërtetë se ju votuat në primare, por nuk është rastësi që ju zgjodhët kandidatë që i do dhe LSI.
Arsyeja është se vetë LSI i ofroi ata kandidatë në bashkëpunim me Doktorin dhe ju testoi ju se kë donit më shumë.
Fjala vjen, në Dibër ju e patë se një nga 4 kandidatët e kishte mbiemrin Kryemadhi, dhe të gjithë votuat atë.
Pse votuat atë dhe jo një tjetër?
Arsyeja është se ju patë atje shpresën që ai mund të jetë dhe i LSI-së.
Kjo iu nxiti të jeni konsensualë.
Po ashtu në Durrës ju patë plot emra kandidatësh, po votuat Mukën.
Pse e bëtë këtë? E bëtë se e kuptuat që ai s’ka qenë kurrë me PD, por gjithmonë e ofronte Farua nga ana e LSI.
Dhe ja ku e keni tani kandidat konsensual.
Ju kishit në Vorë plot alternativa të tjera, por votuat Lul Vranën.
Pse e bëtë këtë? E bëtë se atë e kanë shkarkuar nga kryetar PD-je që më 2015 dhe prej atëhere ai ka punuar për LSI.
Tani është koalicioni i ëndrave të tij ndaj dhe ju e votuat atë.
Po kështu mund të themi dhe për Rrogozhinën.
Pra siç e shikoni, shumica e kandidatëve që ju vet keni votuar, janë të LSI.
Kjo tregon se elektorati e ka sanksionuar me votë aleancën me LSI dhe partinë e përbashkët me ta.
Tani suksese dhe përpara!”