Lajmi se policia ka arrestuar disa shtetas italianë që janë përdorur për të hedhur molotov në protestën e dështuar të opozitës, ka shkaktuar shumë debate brenda PD. Demokratët e Mamurrasit i kanë çuar një paralajmërim Mulit, se nëse ai mendon se mund t’i zëvendësojë ata me mercenarë, të mos shkelë më me deputetin Hoti në Mamurras.
Të njëjtën revoltë kanë pasur dhe demokratët e Laçit dhe Lezhës. Këta të Durrësit nuk kanë reaguar.
Duke diskutuar me Lelon për këtë problem, Mulit i lindi një ide.
-Duhet të fokusohemi se ne jemi parti e lidhur me Perëndimin, tha Muli, dhe ata nuk janë mercenarë, por vullnetarë nga Italia.
Të themi që na i ka ofruar partia e djathtë italiane.
-Dakord, tha Lelo, por do thonë kush ua siguroi këtë lidhje, se Meloni puthet me Ramën.
-Për këto punë kemi Tritan Shehun, tha Muli. Ai flet në emër të çdo italiani, nuk e ka problem. Madje ai mund të na gjejë vërtet dhe vullnetarë italianë, pasi mund t’u japë ndonjë bursë tek ai universiteti që drejton dhe pagesa të jetë me pjesëmarrje në protestat e opozitës me molotov.
-Epo mirë atëherë, tha Lelo. Të fokusohemi tek fakti që protesta e opozitës po kthehet si Lufta e Spanjës, që do ketë mbështetje ndërkombëtare në njerëz nga e gjithë bota.
-Po, tha Muli. Vetëm se ajo ishte luftë e majtë, kjo është e djathtë.
-Ajo dihet, tha Lelo, s’ka nevojë për shpjegime. Fakti që do përdorim dhe emrin e Tritanit e bën qartazi dallimin.
-Atëherë të jemi të qartë dhe në një zë, tha Muli. Do themi që në protestat e ardhshme vullnetarët nga Italia, Gjermania, Spanja dhe Britania e Madhe do shtohen, se siç ka thënë Doktori, tek opozita shqiptare i ka sytë gjithë bota dhe mezi pret rrëzimin e qeverisë.
-Dakord, tha Lelo. Kjo i jep një farë kuptimi, vetëm se duhet folur dhe me ata italianët se mos tregojnë që thjesht kanë marrë ca lekë dhe nuk e përsërisin më. Kjo do të na dëmtonte kauzën.