Pas intervistës së Argitës tek Zeni.TV rreth të ardhmes së saj në politikë dhe pasurisë së saj, Muli u gëzua shumë.
Mbi të gjitha u gëzua që nuk do kandidojë për kryetare, por do zgjedhë kryetarin e ri të PD me zgjedhje të lira.
Duke qenë se Muli e njeh mirë stilin e zgjedhjeve të lira të Doktorit, intervista e Gitës e qetësoi shumë.
Thirri Lelon dhe i kërkoi të bënte një status mbështetës për intervistën, duke i thurur himne Argitës.
-Po çfarë të them, i tha Lelo?
-Thuaj që ka femra të bukura që duken të shëmtuara kur flasin, dhe femra të shëmtuara që duken të bukura kur flasin.
-Jooo, tha Lelo. Nuk mund ta them këtë. Pjesën e parë dakord, por të dytën se them dot.
-Po, ke të drejtë, tha Muli, por rregulloje vet. Ky të jetë kuptimi.
Pastaj dua të merresh me këtë shpengimin që ka bërë për shtresën e mesme.
E ka thënë shumë bukur. Nuk ka rëndësi sa para ke, tha.
Mund të kesh miliona por nuk do të thotë se je e pasur.
Gjithçka varet nga stili i jetesës. Dhe unë kam një stil jetese të shtresës mesme.
-Kjo është e bukur, tha Lelo, po na hap telashe. Na thellon konfliktin me Zenin.
-Pse?
-Po se duket sikur e ka inatin me Karminën, se ajo jeton si shtresë super e pasur.
Vila 20 mijë euro në muaj qiraja, paguan 2 mijë, hotele luksoze, rroba të shtrenjta.
Madje sa bëjnë të brendshmet e saj, ty të bëjnë gjithë rrobat.
-Ke të drejtë, tha Muli. Po s’kemi ça bëjmë. Ne duhet të mbështesim Argitën njëherë.
Pastaj po u prek Zeni merremi me të. Por ai ndoshta nuk do të quhet shtresë e mesme, do të quhet shtresë e pasur.
-Po, ka shume mundësi, tha Lelo. Se ndryshe po të ishte për shtresë të mesme, pse do harxhonte gjithë ato miliona.
-Atëhere të mos humbasim kohë, tha Muli. T’i vëmë pikat mbi i.
Argita është shtresë e mesme, jo e pasur, 19 kullat janë për popullin, vajzave u ka blerë shtëpi deri në 400 mijë euro në Evropë, që të mos kenë vila luksoze, dhe vet ka vendosur të jetojë duke gatuar në shtëpi, jo duke ngrënë jashtë.
Ah se harrova, do zgjedhë dhe kryetarin e ri të PD me zgjedhje të lira.
Kjo e fundit ka shumë rëndësi, tha Muli, se këtë të fundit që kemi pas na e pat zgjedhur pa zgjedhje të lira dhe na mori më qafë.