Kryeministri Edi Rama u shpreh i prerë sot se vendi nuk mund t’i lihet Lulzim Bashës, pasi sipas tij ai është një kukull në PD.
Sipas Ramës nëse vjen Basha në pushtet, vendi bie në duart e Ilir Metës e Sali Berishës që e kthyen Shqipërinë në plaçkë të bërë copash. Rama tha se mandati i tretë duhet pikërisht që të mos kthehen pas ndryshimet e nisura.
“Luli thotë pse merresh me mua, po me këtë të merrem. Në fakt me Lulin nuk duhet të merreshim fare se është thjeshtë një kukull, është Gjino që shërben për të krijuar një dasmë dhe ka një dhëndër të ri, ndërsa trimi që gjuan me gurë atje dihet që është Iliri. Ashtu siç dihet shumë mirë pse i ati i Gjinos kërkon Marigonë.
Por Marigoja është Shqipëria që kërkon ta kthejë në një plaçkë që e ka bërë copash. Kjo s’ka për të ndodhur më, pasi ne do e ngremë në një nivel tjetër dhe do e bëjnë të pakthyeshëm këtë gjë dhe për këtë duhet mandati i tretë. Mandati i tretë është një mandat për të garantuar atë që kemi arritur dhe krijuar kushtet për të krijuar kushtet që ky kthim pas të mos ndodh më”
“Një punë të më tregojnë? Kemi futur Shqipërinë në NATO? Shqipërinë në NATO e ka futur SHBA! Ky vend ka qenë është dhe do të jetë një vend që do të shkoj në luftë me SHBA dhe NATO-së si vend i NATO-s. Këta që shkatrruan ushtrinë, këta që ushtarakët i zhbënë, këta gërdecxhinjtë. Po arsimin e kioskave dhe shëndetësin e qofteve dhe byrektoreve, e harruat, ku janë këta?!
E përfytyroni një moment sikur COVID të na kishte gjetur me spitalet e tyre. Ne do të ishim bërë jo gaz i botës, por parodia e kontinentit. Këto nuk kishin asnjë autoambulancë. Ky është fakt. Do të vazhdojmë punën për t’i ngritur këto në një nivel tjetër, apo do të kthehemi prap në kohën kur shtyheshin ambulancat.”- tha Rama.