Pak javë më parë qeveria shqiptare noftoi për vendimin e ndalimit të importit të makinave të para vitit 2009. Një vendim që padyshim do të sjellë pështjellime në treg dhe do të rrisë kostot.
Qeveria u justifikua për këtë vendim përmes ministrit të Turizmit dhe Mjedisit, Blendi Klosi, sipas të cilit, kjo masë mmerret për mbrojtjen nga ndotja. Por si veprohet në vende të tjera? Në Itali politika e ndërrimit të automjetit bëhet me subvencion, pasi vetëm kështu mendohet se qytetarët do të nxiten për të kryer një veprim që u kushton jo pak.
Me subvencione po mendon ta zgjidhë këtë çështje edhe një vend fqinj me ne Maqedonia, e cila do të subvencionojë makinat me gaz. Ose edhe instalimin e impiantit të gazit në makinat ekzistuese.
“Vjeshtën e ardhshme do të publikohet shpallja e parë e subvencioneve për instalimin e pajisjes së gazit në makinë. Ligji për automjetet përmes së cilës do të mundësohet kjo masë është në procedurë parlamentare dhe duhet të miratohet deri në fund të vitit.
Vitin e ardhshëm duhet të miratohen të gjitha rregulloret për zbatimin e tij, ndërsa përpara fillimit të sezonit të ardhshëm, kur fillon periudha e ndotjes së madhe e ajrit, të nisë edhe kjo masë. Rreth 3 milionë euro janë rezervuar për këtë qëllim, mjete që çdo vit do të rriten”, raporton Alsat TV.
Siç shihet në vend të një mase radikale që e cenon shumë një shoqëri që nuk hyn te të pasurat, Maqedonia po mendon një hap më gradual dhe që merr në konsideratë aspektet sociale. 3 milonë euro për vendosjen e impiantit të gazit, ndërkohë që në Shqipëri qeveria të thotë prerë: do makinë, blije të re.
Pra me gaz apo pa gaz, me ndotje apo jo, makinën blije të re. Nga ana tjetër nëse monitoron në mënyrë sipërfaqësore tregun e karburanteve në Shqipëri, ai vazhdon të mbajë rekorde në çmimet e veta absurd dhe agjencitë e shtetit shqiptar nuk e vënë ujin në zjarr.
Sot që flasim po trumbetohet me të madhe se nafta në tregjet botërore ka arritur minimumin e çmimit, ndërkohë që në Shqipëri ajo njeh rritje.
Edhe çmimi i gazit ka shkuar në 750 lekë të vjetra litri, ndërkohë që pak muaj më parë ishte 600, një rritje krejtësisht e pajustifikuar dhe që nuk reflekton ndonjë gjë tjetër veç nuhatjes për rritjen e kërkesës, shkruan Respublica.
Për t’u kthyer te Maqedonia sërish, Alsat raporton se bashkë me subvencionimin e makinave me gaz, apo instalimit të impiantit të gazit, do të subvecionohet edhe për stufat me peletë për dritaret e aluminit dhe PVC-së, por edhe për panelet diellore.
Sipas këtij televizioni kush instalon pajisje të tilla subvencionohet me rreth 50 për qind të kostove, pra nga 800-1200 euro që kushton një stufë, qeveria merr përsipër 400-600 euro. Nuk është pak sigurisht. Dhe këtu synohet ulja e konsumit të lëndës drusore.
Të dyja masat të marra së bashku sjellin përfitime mjedisore, por detyrojnë ristrukturimin e tregut. P.sh me shtimin e makinave të gazit do të bjerë përdorimi i naftës dhe benzinës që çon vetiu në ulje çmimesh. Por kjo është faturë që shkon te sipërmarrësit që duhet të kuptojnë kohën që po vjen.
Në Shqipëri faturën e paguan konsumatori që detyrohet të përshtatet me gjithfarë marifetesh dhe të kërkojë rrugë që e çojnë drejt kostove të përballueshme.
Por që të ndiqen këto rrugë është e qartë se do goditen disa monopole në treg që sot vendosin çmime të kripura për naftën dhe benzinën pa u kontrolluar as për cilësinë. Dhe këtë gjë qeveria aktuale nuk ka fare dëshirë ta bëjë. Përkundrazi.