Garimi më vete në zgjedhjet parlamentare të 25 prillit pritet të kthehet në bumerang për Lëvizjen Socialiste për Integrim. Ndërsa na ndajnë fiks 20 ditë nga dita kur qytetarët shqiptarë do t’u drejtohen kutive të votimit, shumica e sondazhe në vend, e nxjerrin Partinë Socialiste forcë të parë, ndërsa Partinë Demokratike subjekt politik në rritje.
Por duket se një dorë të mirë PD-së së drejtuar nga Lulzim Basha, i ka dhënë dalë në koalicion me partitë e vogla dhe lënia jashtë tij të LSI-së. Gazeta gjatë këtyre ditëve ka publikuar detaje nga sondazhe sidomos në katër qarqet kryesore të vendit si Tirana, Durrësi, Elbasani dhe Fieri në nivel mandatesh, ndërkohë që sot po sjell për lexuesit përllogaritjet në numër votash, sa u takon ndarjeve të tyre brenda opozitës së bashkuar. Më konkretisht, sipas sondazhit të publikuar javën që lamë pas nga “MRB” për “Euronews Albania”, PD rezulton se ka 27.8% të votave, ndërsa LSI 3.7%.
Kjo do të thotë se ky rezultat i përkthyer në numër votash shkon diku tek 5 mijë në gjithë Qarkun e Fierit për partinë e Kryemadhit, ndërkohë që krahasuar me rezultatin e zgjedhjeve të fundit parlamentare të vitit 2017, ku ajo kishte marrë rreth 21 mijë vota në këtë qark, i bie që Lëvizja Socialiste për Integrim tkurret me 16 mijë vota, të cilat i shkojnë Partisë Demokratike, pasi kjo parti rezulton subjekt politik me rritje në këtë qark. Pra, nëse i analizojmë këto të dhëna, dalim në konkluzion se Basha i ka dhënë goditje të fortë Kryemadhit me largimin nga koalicioni, pasi kjo forcë politike rezulton partia me rënie të madhe elektorale.
Në Tiranë LSI humbet 25 mijë vota
Por Qarku i Fierit nuk është i vetmi që PD “kafshon” elektoratin e LSI. Edhe në Qarkun e Tiranës skema e ndjekur nga kryedemokrati Lulzim Basha për të hyrë në koalicion pa partinë e Kryemadhit, duket se ka rezultuar efektive për demokratët. Kështu, sipas sondazhit të publikuar javën që lamë pas nga “MRB” për “Euronews Albania”, nëse zgjedhjet parlamentare do të mbaheshin këtë të dielë në Qarkun e Tiranës, Partia Demokratike merr 31.7% të votave, ndërkohë që Lëvizja Socialiste për Integrim ka një rënie, pasi, ajo do të merrte vetëm 6.4% të votave.
Gazeta ka bërë përllogaritjet dhe e ka përkthyer atë në numër votash, ku rezulton se në Tiranë partia e Kryemadhit do të merrte rreth 30 mijë vota nga 55 mijë që ka marrë në zgjedhjet e fundit të vitit 2017. Kjo do të thotë se diferenca është me 25 mijë vota minus për LSI-në, të cilat duke iu referuar rritjes elektorale që ka pësuar PD në Qarkun e Tiranës, kanë shkuar për Partinë Demokratike. Pra edhe në këtë rast skema e ndjekur nga Basha për të mos futur në koalicion Lëvizjen Socialiste për Integrim ka dhënë efekt dhe madje mund të quhet efektive. Nga ana tjetër, duke se i njëjti fat e ndjek LSI-në edhe në dy qarqet e tjera kryesore sipas sondazhit të “MRB” për “Euronews Albania”.
Durrësi dhe Elbasani
Më konkretisht, nëse zgjedhjet parlamentare do të mbaheshin të dielën, Partia Demokratike do të merrte në Qarkun e Elbasanit 36.4% të votave, ndërsa Lëvizja Socialiste për Integrim 5.3% të votave. E përkthyer në numër votash për LSI shkojnë 8 mijë vota nga 23 mijë që ka marrë në total në këtë qark në zgjedhjet e fundit parlamentare të vitit 2017, ku diferenca është plot 15 mijë vota minus për partinë e Kryemadhit, të cilat shkojnë për partinë e Bashës, pasi po të shihet me kujdes rritjen që ka Partia Socialiste në mandate e ka për shkak të shtimit të 2 mandateve në Tiranë për shkak të popullsisë dhe për shkak se votat e PDIU kanë shkuar për socialistët.
Ndërkohë edhe në Qarkun e Durrësit nëse zgjedhjet do të mbaheshin këtë të dielë, 36.9% e votave do të shkonin për Partinë Demokratike dhe 5.4% e votave për Lëvizjen Socialiste për Integrim. Edhe në këtë rast e përkthyer në numë votash, LSI merr 4 mijë nga 16 mijë që ka pasur në zgjedhjet e 2017, ku diferenca rezulton në minus 8 mijë vota për partinë e Kryemadhit./Rigels Seliman