211 pedagogë kanë shpërfillur diskutimet për ndryshim të sistemit. Kuvendi i Shqipërisë javën e kaluar kishte shpallur thirrjen për të gjithë profesorët e drejtësisë që të jepnin mendimin e tyre për ndryshimet kushtetuese që kërkon opozita.
Të ftuar në mbledhjen e përbashkët të Këshillit për Legjislacionin dhe Komisionit për Çështjet Ligjore, Administratën Publike dhe të Drejtat, ishin 212 pedagogë, por dha mendim vetëm një pedagoge. Saktësisht ishte Ardita Buna, e cila përmes një mbledhje online dha mendimin e saj mbi këtë çështje.
Mbledhja u drejtua nga deputetja Vasilika Hysi, e cila u shpreh se njoftimi u ishte nisur të gjithëve dhe nuk e kuptonte këtë përgjigje negative nga profesorët. Madje tepër e indinjuar ajo tha se ky propozim ka qenë jashtë interesit dhe është bërë nga ata të cilët nuk kanë përfituar nga pushteti.
“Njoftimin jua kemi nisur personalisht dhe dekanëve, edhe pedagogëve të universiteteve”, tha Hysi. Ndërkohë nga ana tjetër Murrizi e quajti neglizhencë dhe mos përfillje. “Ishte një mos përfillje ndaj Kuvendit, apo ndaj opozitës parlamentare? Kjo s’mund të thuhet me saktësi. Ne si propozues nuk jemi nga ata që në 30 vjet kanë përfituar nga pushteti.
Nuk ka të bëjë me asnjë nga 28 ne firmëtarët, nëse do jemi ose jo më në Parlament. Desha ta zhvesh veten nga konflikti i interesit”, u shpreh Murrizi. Sakaq, pedagogia Buna e pranishme në mbledhje tha se do ishte ideale që ndryshimet të miratoheshin me 140 vota në Parlament, të ketë konsensus të gjithëpranuara. “5% përjashton çdo brez të ri që mund të krijojë parti të re. Edhe 3.5 % ishte mirë”, u shpreh ajo.
Ndërkohë , në fund të mbledhjes Hysi njoftoi deputetët se dhe një pedagoge tjetër kishte kërkuar që të jepte mendim, por nuk kishte mundur të futej dot në linjë për shkak të problemeve me internetin. Gjithsesi Hysi u shpreh se ky veprim tregon papërgjegjshmëri dhe pedagogët duhet të japin një arsyetim në vijim.