Nga Anri Bala
Dje, pas shumë dilemash, se përse ishin ngujuar aty duke refuzuar mësimin, studentët vendosën: Do krijojmë parti politike!
Deri dje, e përkraha protestën, sepse fundja fundit çdo njeri është i pa kënaqur, i përdorur, i mërzitur dhe goja prandaj është… për të shmangur memecrin dhe për të ulëritur që të dëgjoj shurdhani, që të ka shkelur në kallo!
Mirëpo studentët, e them i trembur këtë, dje më befasuan duke më bërë të hesht dhe duke ikur me vrap, pa e kthyer kokën mbrapa, në vendin ku kisha humbur rrugën.
Vërtet studentët janë student, por duhet të kuptojnë, se student, nuk do të thotë as lider, as intelektual dhe as elitë, por pjesa rinore e vendit, që ka pasion dijen.
Nuk e di se kush ua ka thënë, se të studiosh, i “ban të tana”?! Në fakt, të studiosh nuk bën asgjë, aq më tepër kur nuk ke mësuar Abc-në e jetës dhe i referohesh shembullit më të keq të drejtuesve të politikës shqiptare, të bërë nga të pashkollluarit… student të përjetshëm me diploma doktori.
Më thoni në një vend të botës, se njerëz nga bangat e shkollës, që Ajnshtajnin apo Niçen i njohin për emra lokalesh, kanë krijuar parti, kanë ndërtuar demokraci dhe drejtojnë shtet…?! Askund!
I vetmi vend eksperimental, i drejtuar nga partia studento-pedagog, është Shqipëria, që është katandisur nga ata në këtë gjendje, që është sot. Ju, natyrisht keni gjetur shembullin e keq si referim, Kryemadhin dhe shoqet e saj, Metën dhe shokët e tij, Hajdarin dhe hajdarët e tjerë, që sot janë burra dhe gra në moshë, që tabelat e shumëzimit dhe numërimit, nuk i njohin, por i përdorin, ani edhe gabim … për paratë e ndyra të poshtërsive të tyre.
Të drejtosh një shtet, nuk mjafton as dëshira dhe as ideali, por aftësia, përvoja e jetës dhe kryesorja, pjekuria inteklektuale. Vërtet mendoni se ju, që nuk keni mbaruar as stadin e parë të shkollimit, qenkeni aq të zot, të drejtoni vendin? Apo shikoni humorin dhe turpin që na shfaq parlamenti shqiptar me Brahimllara, Mehmetaj, Ballira dhe dhjetra “këllira” të tjerë, që nuk përfaqësojnë askënd, përveçse injorancën e ulur këmbëkryq, në ato karrige aq të nderuara dikur, të turpëruara sot, vetëm sepse mbi ta ulen pagator skrupuloz.
Më vjen keq, por më zhgënjyet me dëshirën për tu bërë…”pulitikan” si ata, sepse me kapacitetin intelektual që keni, vetëm kështu mund të bëhen politikan pulash.
Nuk kam ndërmend t’ua prish ëndrrën. Endërroni, ëndërroni ditë e natë, sepse ëndrrat janë falas deri kur t’u dalin përpara pedagogët, ata që më shumë, ju shfrytëzojnë dhe rrjepin, se sa u mësojnë dhe t’u thonë si baba i tyre: Ngadalë se ka shumë vështirësi zanati… “të mashtrosh qytetarë”.
Politika është arti i mashtrimit dhe i të jetuarit me fjalë, e ju nuk besoj, se po studioni për të mashtruar, por për të drejtuar. Të drejtosh, duhet të kesh kapacitet të lartë intelektual, guxim, përvojë dhe mbi të gjitha, të mos ta njohësh lakminë, që vjen nga dëshirat, perverse të pushtetit.
Ju vleni, por si zëri, guximi, inovacioni dhe ideali i rinisë, por kurrë si… politikan. Politika e bërë nga labaratori eksperimental alla shqiptarë, i partisë studento-profesor, e dërgoi vendin drejt katastrofës… nga padija.
Modeli i drejtimit të vendit nga mediokër dhe megalomanë, që nuk dinë gjënë më elementare, se nuk janë askush dhe nuk dinë asgjë, ishte një ekspriment i dhimbshëm për qytetarët shqiptarë. Rrokopuja e këtij eksperimenti,vazhdon edhe sot e kësaj dite, duke promovuar për elita gjithëfarë gomari, që pëllet më shumë.
Ndaj freno student, e mos fluturo vetëm se mosha të bën të mendosh, se gjithçka që shikon është jotja… edhe bota. Bëj diçka që di vetëm ti ta bësh, diçka të veçantë nga talenti yt dhe mos merr përsipër të bësh atë që nuk di ta bësh, por vetëm se të tundon … shembulli i keq, i pasurimit në vendin tënd dhe timin. /Ekskluzive.al