Sulmet e shumta kundër ambasadorëve dhe reformës në drejtësi, duket se po iu kushtojnë shtrenjtë presidentit Ilir Meta dhe ish-kryeministrit Sali Berisha.
Ish-deputeti Gledion Rehovica plasi bombën pak ditë më parë, duke deklaruar se disa diplomatë kanë pasur takime me zyrtarë të LSI, ku iu kanë kërkuar që të braktisin Kryemadhin. Ka pasur shumë dyshime nëse deklarata e tij është e vërtetë, ndërsa nëse shohim me detaje faktet, duket sikur presidenti dhe ish-kryeministri nuk pëlqehen dhe aq shumë nga të huajt.
Bomba u hodh qëkur Adriatik Llalla ishte kryeprokuror, pasi deklaroi se ambasadori amerikan i asaj kohe, Donald Lu, kishte kërkuar arrestimin e Ilir Metës. Më vonë ish-kryeministri Berisha zbuloi se ish-ambasadorja e BE, Romana Vlahutin kishte kërkuar arrestimin e tij. Vetë Llalla e pranoi një gjë të tillë duke konfirmuar se për SHBA-BE, Meta me Berishën kanë hyrë në listën e zezë që në vitin 2017.
Pakti i 17 majit
Duke mbetur te viti 2017, ajo që e dëshmon fare qartë se LSI shihet si rrezik për stabilitetin është pakti i 17 majit. Rama e Basha në atë takim u bënë bashkë kundër partisë së presidentit. Ai pakt mori bekimin e ndërkombëtarëve dhe i humbur doli padyshim dhe Sali Berisha. Falë takimit me Ramën, Basha largoi nga PD të gjithë xhaketa e vjetra, nga Bode, Imami, Patozi, Topalli, Bregu, etj.
Pra hoqi të gjithë besnikët e Berishës. Ndërkohë këtë vit janë shtuar thirrjet dhe për largimin e Berishës. Sipas burimeve, amerikanët i kanë kërkuar Bashës që të mos e fusë Berishën në lista, ndërsa ai i cili ka përçuar mesazhin është Genc Ruli. Ky i fundit në 4-5 intervista ia ka bërë të qartë Berishës se ka ardhur koha që të largohet.
Djegia e mandateve dhe Kodi Zgjedhor
Një tjetër lëvizje që tregon se është punuar kundër Berishës dhe LSI është djegia e mandateve. Gojët e liga në korridoret e PD thonë se ky ishte një skenar ndërkombëtar, në mënyrë që të siguroheshin votat për reformën zgjedhore. PD ishte në bojkot për Kodin Zgjedhor dhe LSI me Berishën nuk donin që të diskutohej për ndryshimet e reja. Pra ishin kthyer në pengesë për Kodin Zgjedhor.
Basha papritur ndërmori veprimin e djegies së mandateve duke i kapur në befasi. Pas këtij procesi, u zhbllokua votimi i Kodit. PS siguroi votat e nevojshme për të ndërhyrë dhe në Kushtetutë, gjë që do të ishte e pamundur me PD-LSI në Parlament. Heqja e koalicioneve duket se ka qenë një skenar shumë më i thellë, pasi me këtë ndryshim LSI është më e penalizuara.
Ndërkombëtarët nuk e sulmuan PS për këto ndryshime. Madje ambasadorja amerikane e cilësoi si legjitim Parlamentin. Ajo që i vuri kapak ishte Komisioni i Venecias. Presidenti tentoi të rrëzojë këto ndryshime, por edhe Venecia i cilësoi si të drejta dhe nuk rekomandoi ndryshime para zgjedhjeve.
Pra të gjithë lëvizjet, që nga pakti i 17 majit e deri te reforma zgjedhore, kanë marrë bekimin e ndërkombëtarëve. Pyetja që shtrohet është: A është ky një tregues se SHBA-BE duan që Berisha e Meta të mbeten jashtë politikës? Vetë presidenti një vit më parë nisi një sulm të paprecedentë ndaj ndërkombëtarëve. Arriti deri aty sa e krahasoi ambasadën e SHBA me kokainën e Xibrakës. Po ashtu foli edhe për një puç ndërkombëtar kundër tij. Kohët e fundit retorika është zbutur, por Rehovica e tha hapur se LSI nuk e do askush.