Biznesmeni Gjergj Luca ka ironizuar ashpër disa portale në një postim të bërë në rrjetet sociale. Me tone sarkastike, ai shkruan se nëse qeveria i quan mediat “kazanë”, atëherë “qeveria e tij” ka vendosur që portalet shpifëse dhe gjobëvënëse të vendosen në dyert e tualeteve.
Në postimin e tij, Luca shkruan:
“Nëqoftëse qeveria e atij të gjatit i quan ‘kazanë’, qeveria ime sot vendosi në unanimitet të plotë që port-halet shpifëse dhe gjobëvënëse të lartësohen për kontributet e tyre në dyert e nevojtoreve:
Haleja për femra – Jeta osh qejf
Haleja për meshkuj – Pamfleti
Ju uroj jashtëqitje të mbarë e të rehatshme”, shprehet Gjergj Luca.
Pak ditë më parë, gjithashtu Luca ka reaguar pas disa aludimeve të të njëjtave media për një incident të supozuar në kompaninë e tij Rozafa Fish City. Përmes një deklarate publike, Luca dhe stafi i kompanisë kanë hedhur poshtë pretendimet e disa mediave, duke sqaruar se, sipas tyre, informacionet e publikuara nuk pasqyrojnë të vërtetën.
“Jeni mësuar me biznesmenë e me politikanë frikacakë që i sulmoni, i poshtëroni e i gjobisni, por me Gjergj Lucën dhe me kompaninë ndërkombëtare Rozafa nuk keni shans të shkelni mbi punën dhe djersën tonë. Sa herë do shpifni, aq herë do ua përplas në fytyrë shpifjet tuaja tashmë të dala boje. Doni luftë ju port-hale? Luftë do gjeni edhe në rrjetet sociale, edhe në gjykata!”, shprehej Luca në reagimin e tij.