Të gjithë banorët që preken nga projekti i Unazës së Madhe e që nuk janë kontaktuar nga Autoriteti Rrugor Shqiptar duhet të paraqiten pranë këtij institucioni për të marrë çdo informacion që i nevojitet. Një apel të tillë e lëshoi dje ARRSH në një njoftim në faqen zyrtare të saj, ku ndër të tjera theksohet se banorët duhet të kenë me vete edhe dokumentet përkatëse.
“Autoriteti Rrugor Shqiptar i bën thirrje të gjithë banorëve të segmentit rrugor “Mbikalimi Pallati me Shigjeta Unaza Shqiponja Loti 1, 2, 3”, të cilët nuk kanë marrë ende kontakt me ARRSH-në, të paraqiten pranë institucionit të Autoritetit Rrugor Shqiptar dhe t’i drejtohen Drejtorisë së Planifikimit Strategjik dhe Operacioneve me të gjitha dokumentet përkatëse”, thuhet në njoftimin e ARRSH.
Sipas ARSH-së, objektet që preken nga projekti janë 242, sipas verifikimeve paraprake të bëra nga grupet e punës. Në lidhje me këtë reagim të ARRSH reagoi dje edhe Partia Demokratike, e cila përmes deputetes Dhurata Çupi deklaroi se qeveria po përpiqet të bëjë diversion dhe të përçajë banorët.
“Qeveria po përpiqet të bëjë diversion mes banorëve protestues tek Unaza e Re me qëllimin final përçarjen dhe mashtrimin e tyre. I tillë është qëndrimi i sotëm Autoritetit Rrugor Shqiptar, i cili fton banorët “të marrin kontakt ne ARRSH-në për të marrë informacionin që u nevojitet. Banorët e zonës tek Unaza e Re janë në të drejtën e tyre kushtetuese dhe ligjore për të protestuar dhe mbrojtur pronën e tyre.
U bëj thirrje të gjithë banorëve që përballen me dhunën dhe presionin e qeverisë të mos bien pre e mashtrimit!”, tha ajo në rrjetet sociale. Sipas Dhurata Çupit, qytetarët nuk do të marrin zgjidhje nëse shkojnë tek zyrat e ARRSH. “Qytetarët duhet ta dinë se: Paraqitja në ARRSH nuk është zgjidhje ligjore, por diversion dhe manipulim I tyre. Ligji për shpronësimet publike ka përcaktuar qartë procedurat që ndiqen në çdo rast të shpronësimit.
Ky proces duhet të jetë transparent dhe jo selektiv. Në kushtet e errësirës informuese, përmes akteve në kundërshtim të plotë me ligjet shqiptare, ARRSH u kërkon banorëve të paraqiten pranë këtij institucioni, me dokumentet që ata posedojnë, duke tentuar kështu tejkalimin e parashikimit ligjor për shpronësimet”, u shpreh ajo.