Kryeministri Edi Rama ka paralajmëruar se shumë shpejt mazhoranca do të nisë punën për izolimin e presidentit Ilir Meta. Partia Socialiste u tërhoq nga shkarkimi i presidentit me argumentin se do të bëjë ndryshime ligjore dhe kushtetuese për të mos lejuar më gafa si ajo me shtyrjen e zgjedhjeve apo emërimet në Gjykatën Kushtetuese.
Dje nisi sesioni i ri parlamentar dhe kryeministri në fjalën e tij tregoi se cilat do të jenë prioritetet e mazhorancës. Rama në fjalën e tij deklaroi se gjëja e parë që duhet të miratohet është ligji për presidentin, ku bëhet fjalë për një ligj organik ku do të përcaktohen qartë veprimet dhe mosveprimet e kreut të shtetit.
Sot që flasim, Presidenca është i vetmi institucion që nuk ka një ligj të posaçëm. Shefi i qeverisë tha se ky ligj është sa i nevojshëm aq sa edhe i munguar në gjithë këto vite. “Është koha që të shtyjmë përpara draftin e ligjit për Presidentin e Republikës. Është një draft i shfaqur dhe i zhdukur shumë herë në skenën e debatit politik, madje, edhe në diskutime të brendshme të palëve që përfaqësohen në parlament.
Mendoj se ka ardhur koha që të ketë një ligj për Presidentin e Republikës. Besoj se ka edhe këtu eksperienca plot, që nuk ka nevojë t’i shpikim, por mjafton t’i marrim, t’i studiojmë, t’i analizojmë, t’i harmonizojmë për të patur një ligj për Presidentin e Republikës, që është sa i nevojshëm, aq edhe i munguar në të gjitha këto vite”, deklaroi Rama.
Marrëveshja për detin
Por kryeministri Edi Rama foli dje nga foltorja e Kuvendit edhe për çështjen e detit mes Greqisë dhe Shqipërisë. Kryeministri deklaroi më tej se ata që e kanë copëtuar detin sot kanë dalë për ta mbrojtur ndërsa theksoi se nuk ka asgjë të vërtetë. Gjatë fjalës së tij, Rama tha se nuk ndahet deti siç ndaheshin tenderat kur LSI drejtonte ARRSH-në. “Mos u bëni qesharakë dhe të poshtër.
Sepse ata që i fryjnë këtij zjarri e dinë mirë se nuk ka asgjë të vërtetë. Në vend që të punojnë për shqiptarët, duan t’i përdorin. Të kapin ndonjë votë. Kap ça të kapësh! Dhe nisen me varka mono për të mbrojtur detin, duke i rënë lopatës majtas djathtas. Deti aty është, nuk ka lëvizur.
Nuk është dot as deti, as toka. Nuk ndahet, siç ndaheshin tenderat kur LSI drejtonte ARRSH-në, sepse negociatat bëhen me persona të autorizuar, nuk bëhen me muhabet varkash. Dhe nëse një autoritet që është qeveria firmos një marrëveshje, ka një tjetër që e gjykon. Është zoti President. Ai e di shumë mirë që po nuk erdhi deti tek ai, askush nuk ka çfarë do t’i bëjë detit”, tha Rama. Kryeministri deklaroi se Meta-Berisha-Basha bënë një marrëveshje të gabuar në vitin 2009.
“Ata që e kanë copëtuar detin sot kanë dalë ta mbrojnë. Ilir Meta, Sali Berisha dhe Lulzim Basha bënë marrëveshjen më të gabuar. Monika Kryemadhi nuk ka pasur lopata në atë kohë. Marrëveshjen e bënë me firma dhe me vula, s’ka marrëveshje me fjalë. E firmosi me buzëqeshjen më të gjatë që kam parë në fytyrën e Lulzim Bashës. Ishte buzëqeshje me milje, po ta shohësh edhe nga pas, mund ta shohësh edhe me buzën pas. Ka dalë Ilir Meta e ka mbrojtur në atë kohë me gjithë peshën e tij, edhe fizikë. Ishte dyfish atë kohë”, tha Rama.
Hapja e listave
Kryeministri deklaroi se një tjetër pikë kryesore që Kuvendi duhet të arrijë konsensus sa më parë është hapja e listave dhe përcaktimi në Kodin Zgjedhor të mekanizmit të koalicioneve parazgjedhore si një subjekt zgjedhor. “Duhet të vendosim dhe për koalicionet parazgjedhore, si një subjekt zgjedhor. Ne kemi atë shqetësim që kemi pasur qysh ditën e parë.
I vetmi problem për ne, lidhur me kërkesën për të hapur listat 100% është garantimi i ekuilibrit gjinor. Duhet një mekanizëm i besueshëm, atëherë për ne nuk ka asnjë problem. Nëse s’ka mekanizëm të besueshëm, mos prisni që të hapim listat 100%. Listat e hapura 100%, në kohë, ku për të gjetur një grua mes 50 burrave, nuk çojnë asgjëkund për ne. Kjo nuk është një sfidë e panjohur. Jam i bindur se bashkërisht se do të gjejmë një rrugë siç e gjetëm”, tha Rama. Shefi i qeverisë deklaroi se me buxhetin ri do ketë rritje pagash për mjekët e mësuesit.