Ermal TELHA
Marrë shkas nga një publikim i Reporter.al me autor gazetarin Gjergj Erebara (https://www.reporter.al/qeveria-urdheron-mosregjistrimin-e-pronave-qe-pengojne-investitoret-strategjike/), për të bërë disa pyetje, konstatime dhe sugjerime. Konkretisht:
Ju me të drejtë Gjergj, ashtu si edhe unë, mendoni se ligji 7501 ka sjellë më së shumti probleme dhe aspak zgjidhje. 450 mijë hektarë tokë të shpërndara në 1.8 milion ngastra vetëm zhvillim nuk kanë sjellë në plot 27 vite, madje kanë shkaktuar konflikte të shumta që kanë precipituar deri edhe në vrasje.
Duhet zgjidhur kjo gangrenë, Gjergj, por duke mos pasur mundësi ta zgjidhim dot të gjithën, a nuk duhet të fillojmë nga diku?! Meqenëse turizmi është prioritet për të gjithë ne, nuk mendoni edhe ju si unë, që duhet nisur pikërisht nga Bregdeti?!
Kemi 27 vite që i mbajmë larg investitorët potencialë, Gjergj, do vazhdojmë t’i mbajmë akoma larg?! Nuk na afrohen sepse nuk kanë gëzuar asnjëherë status të veçantë sikundër në vendet fqinjë, ku kanë investuar jo pak. Investimet strategjike, në qoftë se nuk trajtohen me status të veçantë, janë të destinuara të dështojnë, Gjergj dhe ne e dimë mirë këtë.
Besoj se je në dijeni Gjergj, që ligji për mbrojtjen e investimeve të huaja ekziston me kohë e me vakt, që në fillim të viteve ‘90, tani thjesht u zgjerua mundësia e pjesëmarrjes së investitorëve vendas. A nuk duhet të jemi pak më nacionalistë në këtë pikë, duke i dhënë prioritet investitorëve potencialë vendas, në mënyrë që kapitali të mbetet po këtu?!
Po TAP-it, a do të duhej t’i hiqej statusi i investitorit strategjik, Gjergj?
Po historinë (e trishtueshme) me investimet e huaja të turizmit në Kakome (që çoi në largimin e gjigandit të turizmit “Club Mediterrane”), ku u goditën fizikisht investitorët dhe ikën nga sytë këmbët, a duhet ta mbajmë për model zhvillimi? Kakomeja sot nuk i jep asnjë gjë turizmit, ekonomisë së zonës apo identitetit tonë turistik.
Pezullimi i përkohshëm i dhënies së titujve të pronësisë, nuk është i barazvefshëm me tjetërsimin e pronës Gjergj, është e pandershme ta trajtojmë si të tillë. Mos do ishte më e ndershme që të kërkojmë kompesime me vlera tregu që përfituesit të kënaqen prej tyre, investitorët të realizojnë projektet strategjike, shteti të rregullojë situatën dhe ne si qytetarë të hedhim themelet e turizimit që duam?!
Garancia shtetërore për Investitorët strategjikë, pa dallim shtetësie, ngjyre apo pasaporte, e munguar deri më sot, është domosdoshmëri për të garantuar zhvillim të qëndrueshëm në çdo sektor, pa diskutim edhe në turizëm. A nuk mendoni edhe ju si unë në këtë pikë?! Madje, unë mendoj që Investitorët potencialë shqiptarë duhet të gëzojnë privilegjin të parët.
A nuk mendoni dhe ju si unë Gjergj, që turizmi elitar që ende nuk e kemi, duhet të kishte ardhur me kohë në Shqipëri?! Është hapi më i rëndësishëm drejt konsolidimit të sektorit dhe fillimit të një epoke te re, siç ne dhe fëmijët tanë e meritojmë. A nuk mendon Gjergj se jemi vite larg fqinjëve tanë si Mali i Zi, Kroacia (ku së fundmi po gjenden edhe plehrat e papërgjegjshmërisë sonë në brigjet e tyre), Greqia apo Turqia?! Ata, pikërisht nëpërmjet favorizimit të investimeve strategjike kanë arritur aty ku janë, ku ne ende e kemi ëndërr të shkojmë.
Edhe e fundit për të mos u zgjatur më tej, jeni i kënaqur ju, Gjergj, me akomodimin, shërbimin, infrastrukturën turistike në Bregdetin tonë?! Besoj që jo, prandaj na duhet që të bëjmë atë që na takon në favor të iniciativave që na zbardhin faqen të gjithëve. Turizmi është një e mirë publike të cilës, secili në mënyrën e vet, duhet t’i shërbejmë.
Natyrisht, unë distancohem nga të gjitha punët e mbrapshta të të gjitha qeverive deri tani në lidhje me zhvillimin e turizmit dhe të investimeve strategjike, por duhet domosdoshmërisht të kapim kohën e humbur.
Për këte, besoj se jemi në sinkron të plotë, Gjergj?!
