30 vjet pas rivendosjes së marrëdhënieve diplomatike Amerikë-Shqipëri, zëvendës ndihmës Sekretari i Shtetit dhe përfaqësuesi i posaçëm amerikan për Ballkanin Perëndimor, Mattheë Palmer vlerëson se ka ende shumë punë për të bërë në rrugëtimin e demokracisë dhe zgjedhjet e 25 prillit duhet të jenë një garanci e mirë në këtë drejtim.
“Ne u ndjemë shumë të kënaqur që pamë parlamentin shqiptar të miratonte legjislacionin, në përputhje me rekomandimet e ODIHR për reformën zgjedhore. Ne duam të shohim që legjislacioni i ri të vihet në zbatim dhe që zgjedhjet e prillit të kryhen në bazë të standardeve më të larta ndërkombëtare”, tha Palmer!
Gjatë intervistës për “Zërin e Amerikës”, Mattheë Palmer vuri theksin tek reforma në drejtësi duke vlerësuar përparimin e bërë deri më tani.
“Kemi kuorum për Gjykatën Kushtetuese, e cila është formuar; Gjykata e Lartë po shqyrton çështje, kanë filluar të trajtohen çështjet e prapambetura, procesi i verifikimit po funksionon. Shtetet e Bashkuara janë të angazhuara për të punuar me partnerët tanë shqiptarë që reforma gjyqësore të mos e humbasë forcën dhe që përparimi i bërë të vazhdojë, të vazhdojë prirja e deritanishme.”
Mattheë Palmer gjithashtu garantoi se qasja e SHBA ndaj Ballkanit Perëndimor, nuk ka ndryshuar dhe shtoi se administrata Biden-Harris është e angazhuar fort për të mbështetur demokracinë, reformën në drejtësi, transparencën dhe sundimin e ligjit.
“Për Shqipërinë, mendoj se ajo ku do të përqendrohemi është të bëjmë gjithçka mundemi për të ndihmuar vendin të ecë përpara në rrugën e tij europiane.
Do të dëshironim shumë të shihnim mbajtjen e konferencës së parë ndërqeveritare, mendojmë se kjo është diçka që Tirana e ka merituar, Shkupi gjithashtu. Do të dëshironim që Bashkimi Europian ta mbajë premtimin.”
Duke i’u referuar të ashtuquajturës diplomaci vaksinash të ndjekur nga Kina dhe Rusia në Ballkan, zëvendës ndihmës Sekretari amerikan i Shtetit u shpreh se Covax do të sigurojë më së miri shpërndarjen e drejtë të furnizimit me vaksina në të gjithë botën.