Krijimi i herëpashershëm i partive politike nga brekushet e Partisë Socialiste dhe Partisë Demokratike duket se është një lojë e vjetër e ujqërve të politikës shqiptare për të mos lejuar krijimin e partive të vërteta politike që mund t’u minojnë pozitën dominuese prej tre dekadash.
Për të konfirmuar këtë dyshim të fortë mjafton të kujtojmë partitë e Genc Pollos, Bamir Topit, Ben Blushit, Kreshnik Spahiut, Gjergji Bojaxhiut etj., të cilat jo vetëm nuk e kanë lëvizur kënetën politike, por kanë blinduar më tej pozitat e kokave të politikës në Shqipëri, që vjedhin dhe sundojnë prej tre dekadash vendin.
Të gjitha këto parti kanë shërbyer për disa muaj për të tërhequr flukset e të revoltuarve me kastën politike dhe kështu ka vijuar loja vit pas viti. Të gjitha krerë e këtyre partive kanë qenë pjesë e kastës politike dhe si të tillë nuk kanë fituar besimin e shumicës së shqiptarëve, të cilët janë kundër të PD-PS dhe merimangave të tyre.
Disi ndryshe është historia e Lëvizjes Socialiste për Integrim. Nëse partitë e tjera të vogla u shuan që vitin e parë, LSI u shndërrua në bandën më të madhe dhe të organizuar të hajdutëve në Evropë.
Nëse PD-PS tregonin deri diku kujdes në plaçkitjen e vendit, kapjen e administratës dhe drejtësisë, LSI, gjatë tetë viteve në pushtet, në fillim në prehrin e PD dhe më pas në atë të PS, nuk njohu asnjë normë njerëzore, asnjë kornizë ligjore dhe kufi në vjedhje. Nën maskën e integrimit, LSI tejkaloi edhe PD-LSI në plaçkitje, ndërsa u damkos edhe për blerje votash. Pra, krijimi i kësaj partie në klanin e PS vetëm sa çoi korrupsionin në nivele të panjohura më parë.
Ditët fundit është krijuar një parti e re me emrin ‘Bindja Demokratike’. Ajo është regjistruar në zgjedhjet lokale me kryetar Astrit Patozi. Ky i fundit është pjesë e kastës politike. Patozi ka qenë kryetar u grupit të deputetëve të Partisë Demokratike, kur kjo e fundit ishte në pushtet.
Patozi ka shërbyer si transmetues mes Sali Berishës dhe grupit të deputetëve të PD, për miratimin e shumë ligjeve dhe akteve, të cilat i kanë sjell dëme të mëdha Shqipërisë, ashtu siç po i sjell prej gjashtë vitesh Edi Rama me deputetët e tij.
Nën drejtimin e Patozit, grupi i PD, i ndihmuar edhe nga LSI pas vitit 2009, blindoi me emërime politike Gjykatën e Lartë, Gjykatën Kushtetuese, kapi Prokurorinë e Përgjithshme dhe shumë institucione kushtetuese. Nën drejtimin e Patozit, që zbatonte urdhrat e Berishës, grupi i PD ka marrë me qindra vendime antikombëtare, ka miratuar ligje klienteliste, koncesione dhe marrëveshje, që të cilat do të zhvatin shqiptarët për 30 vitet e ardhshme.
Patozi jo vetëm është pjesë e kastës dhe bashkëfajtorë për të këqijat që kasta politike u ka vjedh shqiptarëve, por ai u është bashkuar kokave të politikës edhe në Gjirin e Lalzit. Një vit parë se Rama dhe Berisha të shkëmbenin pushtetin, Patozi ka blerë një apartament 155 m2 në Gjirin e Lalzit, aty ku ka vilën me vlerë mbi 1.5 milionë euro çifti Ilir Meta-Monika Kryemadhi, aty ku ka vilën Argita Berisha, aty ku pushon Sali Berisha, aty ku kanë vilat gjyqtarët, ministrat, ish-ministrat, deputetët dhe drejtorët e korruptuar.
Të kesh shtëpi në Gjirin e Lalzit nuk është krim dhe kjo nuk e bën Patozin një njeri të korruptuar, por shqiptarët duhet ta dinë se Patozi ka qenë pjesë e kastës politike dhe si i tillë nuk mund të veshë petkun e heroit që do të përmbysë këtë klasë politike./Pamflet