Listat e pagave, kanë konfirmuar akrobacitë financiare, që bën dhe Luan Bregasi, mafiozi i lidhur me kupolën e pushtetit “rilindja”, si xhambaz punësh të pista, konkretisht me fshehjen e evazionit fiskal në bizneset e tij, duke mos u prekur nga tatimet.
Mos u çuditni, por Luan Bregasi figuron drejtor hoteli me paga mujore 30 mijë lekë, te resorti i tij “Palace Hotel&SPA”; të cilin për të mos paguar taksa publike dhe detyrime tatimore reale si kompleks turistik, ai e ka regjistruar hotel të thjeshtë “Biznes i vogël”.
Përveç si drejtor me pagë mujore 30 mijë lekë, po me pagë 30 mijë lekë deklaron në tatime gjithë të punësuarit në resortin e tij luksoz, madje kuzhinierët i deklaron si punëtor ndihmës e pastrimi në kuzhinë e tavolina.
Sipas listës, të 42 të punësuarit që ka deklaruar në resortin e tij luksoz “Palace Hotel&SPA”, Luan Bregasi i ka regjistruar me pagë mujore 30 mijë lekë, që nga roja, recepsionisti, lulishtari, banakierët, kamarierët, pastruesit e deri te arreduesi estetist dhe drejtoresha e politikave të hotelit.
Mashtrimin fiskal, përveç pagave minimale 30 mijë lekë, mafiozi Luan Bregasi e bënë dhe me deklarimin e resortit në tatime, vetëm si hotel për fjetje, kur ai është kompleks turistik me 5 yje, pajisur me Bare, Restorante, salla konferencash, salla dasmash e eventesh artistike, pishina, parking, sauna e kënde argëtimi për çdo moshë.
SPAK duhet të hetojë veprimtarinë dhe bizneset e këtij ish-oficeri sigurimi deri më 1992, tjetërsuar në biznesmen mafioz, të toleruar, financuar me fonde publike nëpërmjet OJF-ve fantazma dhe i mbrojtur nga çdo pushtet, paçka së është një nga kokat e korrupsionit dhe krimit fiskal në Shqipëri.
Duhet hetuar, sepse përveç mashtrimit me resortin dhe detyrimeve tatimore, taksave publike e faturave të energjisë dhe ujit, që i hiqen çdo vit biznesit të tij ndërtimor “SARA-EL shpk”; miliona lekë i hiqen dhe fabrikës së “Birra Tirana”, ku ai është ortak e drejtor me vlerë totale afro 2 milionë Euro në vit.
Duhet hetuar, mbasi Luan Bregasi, me projekte false ka përlarë 26 milionë Euro fonde nga Ministria e Ekonomi-Financave, maskuar pas dy shoqatave të tij private “Biznes Albania” dhe “Dhoma Kombëtare e Zejtarisë”, sikur gjoja përgatisin profesionistë e zanatçinj të rinj që dëshirojnë të punojnë në Shqipëri./Pamfleti