S’kanë të ndalur ankesat për kompaninë Wizz Air. Në këtë moment që flasim, kompania e fluturimit “Wizz Air” është tallur dhe ka braktisur mbi 100 pasagjerë në aeroportin e Pragës, pasi një pjesë e tyre fluturoi drejt Tiranës. Kjo mund të jetë rasti më skandaloz në aviacion, që një kompani fluturimi, merr disa pasagjerë dhe braktis pjesën më të madhe në aerport.
Të damkosur si kompania më e keqe e fluturimit për vitin 2022 dhe 2023, pas fluturimit të djeshëm Londër-Tiranë, ku kompania i zbriti pasagjerët në aeroportin e Shkupit, që t’i sillte më pas me autobuz drejt Tiranës, sot dëgjojmë një tjetër çudi nga Wizz Air.
Mbi 100 pasagjerë, përfshirë gra e fëmijë, janë panikosur kur kanë parë avionin e tyre që nisej drejt Tiranës me një pjesë dhe t’i mbyllej dera në fytyrë, pa asnjë përgjigje, arsye të këtij veprimi dhe se si do të mund të ktheheshin në shtëpi.
Nga komunikimet me njërin nga pasagjerët, që priste të fluturonte drejt Tiranës, kompania e fluturimit, e cila cilësohet si një nga kompanitë ajrore me shërbimin më skandaloz të klientit, shprehet se fluturimi i parashikuar të niset në orën 14:50, pasi e ndryshoi 3 herë orarin e nisjej, si pa të keq fluturoi me një pjesë të vogël pasagjerësh që prisnin të hypnin në bordin e avionit.
“Avioni u ul në aeroport në orën 19:30 dhe u ngrit me një pjesë të vogël të pasagjerëve, duke lënë mbi 100 të tjerë në aeroport. Kompania ndryshoi orarin e nisjes pak ditë më parë, sërisht gjatë ditës së sotme dhe pasdite për ta planifikuar nisjen për në orën 19:10!”, u shpreh njëri nga pasagjerët.
Në një komunikim të vazhdueshëm me pasagjerët mësojmë, se Wizz Air nuk ka ende asnjë përgjigje për zgjidhjen e talljes së radhës me klientët e saj!