Dalja e Fatos Nanos në media pas disa vitesh mungesë dhe deklaratat e lëshuara prej tij në adresë të presidentit Ilir Meta dhe ish-kryeministrit Sali Berisha, vijojnë të shkaktojnë debat e madje të komentohen nga të gjithë. Një reagimit të fortë për këtë interviste ditën e djeshme ka bërë edhe ish-kreu i Aleancës Kuqezi, Kreshnik Spahiu.
Përmes një statusi në rrjetet sociale, zoti Spahiu theksoi se edhe sikur gjithë të zezat t’i kishte Nano, në raport me Berishën e lartëson dorëheqja e tij. Në këtë kontekst, juristi Spahiu shtoi se ish-kryeministri Nano pas humbjes iku përgjithmonë dhe nuk qëndroi duke gjetur një dordolec si “Luli” në PS, që ta komandonte në hije nga Gjiri i Lalzit.
“Për ta mbyllur javën me një konkluzion politik: Edhe sikur gjithë të zezat ti kishte Nano, në raport me Berishën e lartëson dorëheqja e tij. Pas humbjes iku përgjithmonë dhe nuk qëndroi duke gjetur një dordolec si “Luli” në PS, që ta komandonte në hije nga Gjiri i Lalzit. Dorëheqja si institucion e bën diferencën mes një qytetari që ka profesion politikën dhe një provinciali që e ka biznes familjar. Ai iku 15 vjet më parë, tjetri zvarritet ende”, shkruan ish-kreu i Aleancës Kuqezi, Kreshnik Spahiu.
Nga ana tjetër edhe juristi Romeo Kara ka dalë me një reagim të fortë pas zhurmës mediatike që krijoi intervista e ish-kryeministrit Fatos Nano dhe deklaratat që ai bëri publike pas shkëputjes së tij të gjatë nga politika. Përmes një statusi në rrjetet sociale, juristi Kara teksa zbardh prapaskenat e forta politike dhe darkat e tyre të “mëkatit”, theksoi se Fatos Nano i vuri fre babëzisë së Metës.
“Nano i atribuon me të drejtë Metës shtatë mëkatet e mëdhaja dhe pothuaj të pafalshme, por nuk besoj se Meta u bë një mëkatar i tillë pas vitit 2010, kur ai u zhdëp duke pirë raki dhe ngrënë mish derri, nga darka në mëngjes me Nanon tek lokali Chagall ndodhur atëherë në rrugën Kont Urani, që i përkiste mikut të tyre të përbashkët Kastriot Ismaili.
Ky takim i madh “historik” midis dy armiqve të përjetshëm u dha edhe nga media e kohës dhe komentet ishin që dy kundërshtarët i bashkoi qenia e Ramës në krye të PS dhe pengimi i tij për të ardhur në pushtet. Ishte pikërisht Meta që shkaktoi humbjen e PS me 2005 dhe largimin e përhershëm të Nanos nga politika. Megjithatë Nano ka meritë se i vuri fre babëzisë së tij dhe nuk e pranoi ofertën e Hamza Merxhanit për privatizimin e divizionit të shpërndarjes së KESH-it nga CEZ-i. Këtë nder ai ia la Berishës”, shkruan juristi Romeo Kara.