Policia e Tiranës ka arrestuar ish gjyqtarin Alaudin Malaj, 49 vjeç, pasi në kundërshtim me vendimin e Gjykatës, është konfliktuar për pronësinë e një automjeti me fëmijët e tij të mitur të cilët ishin të pajisur me urdhër mbrojtje.
Ky konflikt i ndodhur mesditën e të premtes në Tiranë ka çuar në pranga ish gjyqtarin dhe ish anëtarin e KLD Alaudin Malaj.
Policia thotë se Malaj ka rastisur në një parkim me fëmijët e mitur dhe ka shkelur urdhrin e mbrojtjes për të mos ju afrua atyre të cilët pas divorcit, gjykata i ka lënë në kujdestari të ish bashkëshortes së gjyqtarit.
Ndërsa shkak i konfliktit që ai pati me një prej djemve të tij të mitur ishte pretendimi i djalit se babai përdortë makinën në pronësi të ish gruas, jashtë vullnetit të saj.
Djali i ish gjyqtarit pretendon se makina është e së ëmës dhe se po përdoret nga Alaudin Malaj me forcë dhe jashtë vullnetit të saj, duke çuar në konflikt dhe tone të larta të zërit mes tyre, aq sa është dashur ndërhyrja e policisë. Po ashtu në hetim është vendosur edhe vëllai i tij Agron Malaj, 42 vjeç, për kundërshtim të punonjësve të policisë.
Malaj u shoqërua dje nga patrullat e komisariatit dy të cilat ndërhynë për të evituar agravimin e një konflikti familjar mes ish gjyqtarit dhe djemve të tij.
Gjatë ditës së djeshme Alaudin Malaj pati një konflikt me të birin për një makinë, e cila ka detyruar efektivët e policisë të ndërhyjnë. Në korrik të këtij viti, gjyqtari Alaudin Malaj ka dhënë dorëheqjen nga Gjykata e Apelit teksa ende nuk kishte dalë në vetting.
Por në muajin nëntor ai i ka kërkuar Kolegjit të Posaçëm të Apelimit, rikthimin e çështjes së tij në shkallën e parë të Vetingut. Në letrën e dorëheqjes Malaj shpjegon se ka punuar pranë sistemit të drejtësisë qysh prej vitit 1993, duke shërbyer në disa gjykata të vendit, ku kulmi i karrirës së tij, ka qënë drejtimi i Gjykatës së Apelit Tiranë.