Një ngjarje tragjike është regjistruar këtë të mërkurë rreth orës 16:30 në zonën turistike të Ranës së Hedhun në Shëngjin. Dy të rinj nga Kosova, Leonid Alia nga Fushë-Kosova dhe Jetmir Çopa nga Prishtina kanë humbur jetën si pasojë e mbytjes në det, ndërsa tre të tjerë të identifikuar si Dion Myftari, Arbër Beqaj dhe Drilon Rrustemi ndodhen në spital.
Sipas informacioneve paraprake bashkë me tre të rinj të tjerë ata ishin futur për t’u larë, por janë rrëmbyer nga dallgët e forta. Fatmirësisht 3 të tjerët i shpëtuan mbytjes dhe ndodhen në spital jashtë rrezikut për jetën.
Kanë qenë disa qytetarë që ndodheshin në zonë me Jet Ski, të cilët, në bashkëpunim me policinë, arritën të nxjerrin nga deti pesë të rinjtë, dy prej të cilëve pa shenja jete.
Ndërkohë shfoferi i ambulancës që mori viktimat tha se, ata ishin rreth moshës 25-vjeç dhe kur shkuan në vendngjarje, ata ishin pa shenja jete.
“Ne na njoftoi qendra kombëtare, dhe shkuam në vendngjarje. I gjetëm në breg, por dy prej tyre ishin pa shenja jete. Viktimat ishin rreth moshës 25-vjeç. Kanë qenë në varkë, por është përmbytur për shkak të dallgëve të mëdha. Pasi na njoftuan shkuan 4 ambulanca menjëherë” tha Jak Gjoka, shoferi i ambulancës.
Të rinjtë ishin pjesë e një grupi turistësh nga Kosova, të cilët kishin ardhur me autobusë për të vizituar Shëngjin dhe zonat përreth.
Në zonën e plazhit ku ndodhi ngjarja e rëndë, mësohet se nuk ka kulla vrojtimi dhe as flamuj të kuq që përdoren si sinjalizues për të ndaluar pushuesit të futen në det të trazuar.
“Rreth orës 16:30, shërbimet e Policisë kanë marrë njoftim se në zonën e Ranës së Hedhun, në Shëngjin, disa shtetas që ishin futur në det për t’u larë, si pasojë e dallgëve të shkaktuara nga era e fortë, ndodheshin në vështirësi dhe rrezikonin të mbyteshin.
Menjëherë pas marrjes së njoftimit, në adresën e dhënë kanë shkuar shërbimet e Policisë Kufitare, shërbimet e Drejtorisë Vendore të Policisë Lezhë, si dhe ato të emergjencës.
Falë reagimit të menjëhershëm të qytetarëve me Jet Ski, në bashkëpunim me shërbimet e Policisë, u bë e mundur nxjerrja nga deti e 5 shtetasve nga Kosova, të cilët u transportuan me urgjencë në Spitalin Rajonal Lezhë për marrjen e ndihmës mjekësore.
Sipas informacionit paraprak nga Urgjenca e Spitalit Rajonal Lezhë, 2 prej shtetasve kanë humbur jetën, ndërsa 3 shtetasit e tjerë po marrin ndihmë mjekësore”, njoftoi sot policia.
Grupi hetimor, nën drejtimin e Prokurorisë, vijon veprimet për zbardhjen e plotë të rrethanave të ngjarjes.