Një ditë pas goditjes së 18 magazinave që shërbenin për modifikimin e armëve, bashkëpunëtori i drejtësisë, Enver Jamaku, ka treguar dhe mënyrën se si është njohur me Gjergj Cukalin, i arrestuar për vendosjen e tritolit ndaj Gjon Menës në Kamëz.
Kontaktet e para sipas tij ishin bërë nëpërmjet një personi të tretë, ku Cukali kishte porositur një kallashnikov por takimi i parë u bë në varrimin e Nehat Kullës, në Tujan, në qershor të vitit 2020.
Sipas Jamakut, këtu Cukali i kishte bërë porosi për dy armë pistolete. Sipas tij, armët që donte ishin me silnciator si dhe 15 fishekë.
Pasi i kishte siguruar, Jamaku ia kishte shitur Gjergj Cukalit. Enver Jamaku ka thënë në prokurori se emrin e Cukalit e kishte të regjistruar me emrin “Lashi” në Whatsapp, kjo për shkak se miqtë e tij e thërrisnin në këtë emër.
Gjithashtu, bashkëpunëtori i drejtësisë ka thënë se në nëntor të vitit 2020, sërish Gjergj Cukali i kishte bërë porosi për një tjetër kallashnikov, që ia kishte dhënë në dhjetor. Aty më pas u bë porosia tjetër për vendosjen e eksplozivit në Kamëz, ku mbeti i plagosur Gjon Mena.
Dëshmia e Jamakut ka rënduar ndjeshëm pozitat e Cukalit pas të paktën 3 porosive të tjera për armë por dhe ka zbardhur një seri ngjarjesh të tjera.
Pas dëshmisë, Forcat Speciale RENEA goditën 18 baza që modifikonin armë të ndryshme, mes tyre snajper, granata, pushkë, por edhe armatime të rënda.
Grupi ishte i përbërë dhenga tornitorë që prodhonin në mënyrë artizanale silenciatorë por edhe eksploziv të telekomanduar.