Nënkryetari i LSI, Petrit Vasili, foli për herë të parë publikisht për betejën e tij me koronavirusin.
Në një lidhje me “Skype” për News24, Vasili tregoi se e koronavirusi i dha temperaturë dhe u shtrua në spital për 2-3 ditë për të bërë të gjitha ekzaminimet e nevojshme.
“Ishte një periudhë kalimtare, që zgjati pak ditë, ishte një eksperiencë e drejtpërdrejtë dhe kaq. Patjetër që kemi hyrë në një fazë të re me këtë problematik dhe sot kërkohen qasje tërësisht të reja”, tha Vasili.
Ku u prekët nga virusi?
Kontaktet janë rastësore dhe të pamundura të evidentohen. Gjurmimi që kemi e bën të pamundur këtë. Nuk paraqet interes të vecantë kjo.
Çfarë ndjetë ju në organizëm?
Pata probleme me temperaturën. Kërkova të bëja tamponin, e kam bërë dhe kam përgjigjen. Pastaj jam përpjekur të ndjek disa nga ato protokollet, që konsiderohen të gjithëpranuara.
Pastaj cfarë ndodhi, pse shkuat në spital?
Ishte e nevojshme të bëja disa ekzaminime. Analiza rutinë, sic iu bëhen të gjithë pacientëve. U bë dhe skaner, e gjëra të zakonshme, por që nuk rezultuan të kisha ndonjë problem. Ka shumë më tepër interes që njerëzit të dinë si do shkojmë në vijim.
Sa ditë qëndruat në spital?
Besoj një periudhë sa u kompletuan analizat, 2-3 ditë. Një rutinë normale. Kam bërë trajtim aty ku e gjeta të arsyeshme, nuk besoj se duhet ta ndaj me publikun këtë. E kam kryer tamponin e radhës dhe jam negativizuar.
Ç’mendim keni për menaxhimin e situatës dhe masat e reja?
Beteja me Covid ka tre fjalë: organizim, organizim, organizim. Kjo fuqia organizative ka të bëjë shumë, që gjërat të funksionojnë. Njerëzve iu duhet që pacientët të marrin ndihmën mjekësore sa më shpejt, nuk iu interesojnë shifrat që jep Rama. Nuk na duhet më e vërteta e shifrave, por na duhet organizim. Duhet krijuar dhe ctensionim i situatës, se pak më parë një pacient u hodh nga Infektivi. Duke qenë të mbingarkuar spitalet, janë të mbingarkuar edhe mjekët e infermierët dhe nuk kanë kohë të kalojnë kohë me pacientët si psikologë. Por nëse ne kemi më shumë mjekë në dispozicion, edhe të karakterit psikologjik, do të ketë lehtësim. Koha për trajtim psikologjik është jetik në disa raste. Duhet një organizim.
A do ta mbani maskën pas kësaj që kaluat?
Unë e kam mbajtur maskën, por ju them që maska është një mjet ndër mjetet që përdoren, nuk është mjeti i parë. Në rast se nuk ka testim, gjurmim, dezinfektim dhe disntacim, a na mbron maska? Nëse maska është e vetmuar pa hapat e tjerë, sigurisht që mbetet një mjet me rëndësi të kufizuar. Nëse mbetemi vetëm te maska apo mbyllja e dyqaneve me orare, nuk besoj se do të jemi në një situatë aty ku duhet.