Komisioneri europian për zgjerimin dhe fqinjësinë e mirë, Oliver Varhelyi, u tregua i ashpër me Këshillin e Unionit Europian. Ai kërkoi që hapja e kapitujve të parë të negociatave me Shqipërinë të mos mbahen peng, por të bëhet menjëherë.
“Efektivisht, ne shohim që Shqipëria, ka përmbushur të gjitha kushtet për hapjen e kapitullit të parë. Por sërish, janë ata në anën tjetër të rrugës që duhet të marrin vendimin, pavarësisht se kushtet janë përmbushur.
Ne e kemi bërë propozimin shumë kohë më parë. Tani është momenti që Këshilli i BE-së të mbajë fjalën e dhënë dhe të tregojë besueshmëri në procesin e zgjerimit.
Ne dëshirojmë që kapitulli i parë të hapet menjëherë”, tha Oliver Varhelyi, komisioner i BE për zgjerimin.
Të njëjtën energji nuk e pati lidhur me aplikimin e Kosovës për anëtarësim, duke nënvizuar se një problem i madh është fakti i krizave të vazhdueshme dhe tensioneve.
“Fatkeqësisht, zhvillimet e fundit në Kosovë nuk e bëjnë më të lehtë për Këshillin e BE-së që të na e besojë ne detyrën për të vlerësuar aplikimin e Kosovës.
E kemi thënë shumë herë. Kur Këshilli t’i besojë Komisionit dhënien e opinionin për aplikimin, ne jemi të gatshëm ta bëjmë vlerësimin.
Por ne gjithashtu shohim qartësisht se në vend të qetësimit të situatës, ne kemi elementë të rinj të tensioneve që dalin nga ky shtet, i fundit ka të bëjë me vendimin e Bankës Qendrore që ndaloi një monedhë të huaj.”
Sa i përket Maqedonisë së Veriut, tha se përparimi në rrugën drejt BE-së varet nga qeveria që do të dalë pas këtyre zgjedhjeve. Për Serbinë, pengesë po bëhet Rusia.