Ndërsa Lulzim Basha po bëhet gati të rikthehet në krye të PD-së së vulës, Sali Berisha ka deklaruar se nuk e njeh këtë farsë që e cilëson si manovër të Ramës.
Por njeriu që do ti marrë sot emrin, siglën dhe selinë e partisë është një krijesë e prodhuar prej tij. Pikërisht, tani dhjetë vite më pas, Lapsi.al ka hapur arkivat për të rikthyer në kujtesë momentet kur lideri historik i PD e instaloi delfinin e vet në kryet të partisë që atëherë ishte e bashkuar.
Berisha që humbi zgjedhjet e vitit 2013, ishte ende kryeministër kur dirigjoi garën e padrejtë Basha-Olldashi. Ai vuri kushte që askush mos përkrahte kandidatin e ndjerë.
Ai imponoi një fushatë blitz dhe një garë ku shumë demokratë nuk e gjetën veten as në listat e votimit për të zgjedhur kreun e tyre të ri.
Dhe në fund, si për ironi, pasi i trashëgoi karrigen, Berisha i dhuroi pasardhësit edhe një seli të re, godinën e SHQUP, që shumë vite më pas do të kthehej në arenën e betejës mes tyre.
Tani kur Basha po mëton të rikthehet në krye të PD, është mirë të kthehemi në verën e vitit 2013, që Berisha do të donte ta harronte.