Deputeti i opozitës parlamentare, Myslim Murrizi ka ngritur tonet lidhur me votimin që është zhvilluar në degët e Partisë Demokratike për kandidatët për deputetë sa i takon zgjedhjeve parlamentare të 25 prillit të vitit 2021.
Përmes një postimi në rrjetet sociale, Murrizi ngre pyetjen përse nuk bëhet publike rezultati i votimit për çdo kandidat në të 61 degët ku secili të shohë sesa vota kundër ka marrë, ndërsa sipas tij, votimi me votë kundër është një shprehje mllefi sesa votë besimi.
“Votimi me votë kundra është një shprehje mllefi sesa votë besimi. Në qarkun Fier ishin propozuar nga anëtarësia në fazën e parë rreth 500 kandidatë për kandidate për deputet. Nga komisioni i “filtrit” ishin përzgjedhur 101 kandidate për t’u nënshtruar votës së mllefit, inatit dhe urrejtjes së anëtarësisë së PD së 6 degëve të PD ( Fier, Lushnje, Mallakastër, Divjakë, Patos, Roskovec).
Në votim u futën më pak se 60 kandidatë nga të cilët 20 në Fier, 14 në Lushnjë, 6 në Divjakë, 7 në Mallakastër, 4 në Roskovec dhe 5 në Patos. Po rreth 50 kandidatë ish-drejtorë tatimesh, burgjesh, hipotekash, arsimi, shëndetësie spitalesh, legalizimesh, te ARMOS dhe Albpetrolit, te AKU, Bordit të Kullimit dhe Bujqësisë, pse nuk bëjnë ciu kur jua dh emrin dhe nuk jua sollën fare për votim?
A thua kanë qenë spiunë sigurimi? Apo janë përjashtuar si ish-hajdut administratë? Pse nuk bëhet publike rezultati i votimit për çdo kandidat në të 61 degët, ku secili të shoh sesa vota kundra ka marrë”, shkruan ai. Sipas Murrizit, që të jetë i besueshëm procesi dhe që demokratët dhe shqiptarët të shohin se sa të “virgjër” janë kandidatët duhet që më së pari 4 anëtarë të komisionit të përzgjedhjes së kandidatëve Mustafaj, Nishani, Ruli dhe Marku të bëjnë publike certifikatat e pastërtisë së figurës së tyre nga autoriteti i dosjeve të sigurimit pastaj të kontrollojnë “ kolegët” e tyre.
“Po nga këta që kanë kaluar “testimin” a ka spiunë sigurimi? Por që të jetë i besueshëm procesi dhe që demokratët dhe shqiptarët të shohin se sa të “virgjër” janë kandidatët duhet që më së pari 4 anëtarë të komisionit të përzgjedhjes se kandidatëve Z. Mustafaj, Z. Nishani (Mehmeti), Z. Ruli dhe Z.
Marku të bëjnë publike certifikatat e pastërtisë së figurës së tyre nga autoriteti i dosjeve të sigurimit pastaj të kontrollojnë “ kolegët” e tyre. Sikurse ftoj 4 anëtarët e autoritetit të dosjeve të tregojnë me dokumenta se a kanë qenë vetë spiunë të sigurimit”, nënvizoi Murrizi.