Ish-ministri i Brendshëm, Saimir Tahiri, rikthehet edhe njëherë në pikën zero të përballjes me drejtësinë. Gjykata e Apelit vendosi sot të prishë vendimin e Shkallës së parë dhe të rikthejë çështjen në Gjykatën e Posaçme.
Por, çfarë do të ndodhë tashmë me ish-ministrin Tahiri?
Gazetarja Klodiana Lala thekson për “BalkanWeb” se tashmë fillon një etapë e re për ish-ministrin dhe përballjen e tij me drejtësinë, që krijon jo pak problematika sa i përket karrierës së tij politike.
Siç raporton gazetarja, në momentin që Gjykata e Posaçme e Apelit merr vendimin, automatikisht dosja voluminoze e Tahirit rikthehet në Gjykatën e Shkallës së Parë.
Më pas, caktohet trupa e re që do të shqyrtojë dosjen dhe Prokuroria do të vijojë, duke kërkuar dënimin e Tahirit për akuzën e trafikut të d.rogës në kuadër të grupit k.riminal “Habilaj”.
Ndërkohë, Tahiri do të përballet me Gjykatën e Posaçme në mënyrë të përshpejtuar, ku nëse nuk paraqiten problematika gjatë procesit, do të duhen jo më shumë se 3 apo 4 seanca.
Mund të ndodhë në finale që të jetë vetë Prokuroria, e cila të tërhiqet nga akuza, vetë Gjykata të japë dënim, ose Gjykata të japë pafajësi. Nëse merr pafajësi, mendohet se nuk do të shkohet sërish në Gjykatën e Apelit. Pra, përballja e ish-ministrit me drejtësinë rifillon nga e para.